FC Haka, klubi i njohur finlandez me nëntë tituj kampion, po përballet me një tjetër goditje të rëndë vetëm pak muaj pasi ra nga elita e futbollit finlandez.
Një nga tribunat e stadiumit Factory Field u shkatërrua plotësisht nga një zjarr i madh që shpërtheu të dielën në mbrëmje.
Policia ka arrestuar tre adoleshentë në lidhje me incidentin, dhe një 15-vjeçar ka pranuar sipas raportimeve se ka qenë ai që ndezi zjarrin. Megjithatë, të tre të miturit nuk pritet të përballen me akuza, pasi janë nën moshën minimale të përgjegjësisë penale në Finlandë.
Sellanen sieltä sitten! Onnea tälle Renelle loppuelämään #futis #haka #valkeakoski #Veikkausliiga pic.twitter.com/cc1CgXWoEV
— Jarkko Savolainen (@spenroos) December 8, 2025
Zjarri jo vetëm që shkatërroi të gjithë tribunën, por dëmtoi edhe fushën me bar sintetik, duke i shkaktuar klubit dëme të konsiderueshme në infrastrukturë.
Kryetari i klubit, Marko Larsson, reagoi me zhgënjim: “Ky është një moment që s’na duhej aspak. Kemi marrë shumë mbështetje nga njerëzit dhe do të na duhet edhe më shumë në vijim. Ende nuk kemi vlerësuar koston e dëmeve, por është e qartë që do të jetë e lartë.”
Edhe drejtori ekzekutiv, Olli Huttunen, e quajti ngjarjen tronditëse për futbollin finlandez: “Factory Field ka rëndësi të madhe për klubin dhe komunitetin. Sjellja e tillë, pa asnjë kujdes për pronën e të tjerëve, është e papranueshme. Fatkeqësisht, jetojmë në një botë ku ndodhin edhe këto gjëra.”
Ai shtoi se pamjet e kamerave të sigurisë e bënë të qartë situatën menjëherë: “Në ekran pashë që tribuna e fundit ishte në flakë. Konstruksioni i tribunës kryesore ka mbetur, por do të duhet të shembet. Tani autoritetet dhe kompania e sigurimeve do të vlerësojnë situatën. Pas përfundimit të hetimeve, tribuna do të prishet.”
FC Haka, që ndër vite ka përballur ekipe si Liverpool, Fulham dhe Rangers në arenën europiane, tashmë përballet me sfida të shtuara ndërsa kërkon të rindërtojë infrastrukturën e saj.
Policia e Valkeakoskit u ka bërë apel qytetarëve të mos spekulojnë në rrjetet sociale rreth shkaqeve të zjarrit. Hetuesja Maijastiina Tammisto deklaroi: “Ngjarja ka ndezur diskutime të shumta dhe emocione të forta në komunitet. Kërkojmë qetësi dhe respekt për procesin hetimor.”
Top Channel
