Zhduket liderja e opozitës venezueljane, thellohet misteri pasi fitoi Nobelin e Paqes, ‘lëvizja’ që ngriti dyshime
10/12 14:33
Faza e dytë e marrëveshjes së armëpushimit në Gaza nuk mund të fillojë për sa kohë që Izraeli vazhdon të “shkel” armëpushimin me Hamasin, i cili hyri në fuqi më 10 tetor, tha sot një zyrtar i Hamasit për AFP-në.
“Faza e dytë e armëpushimit nuk mund të fillojë” për sa kohë që Izraeli vazhdon të shkelë marrëveshjen dhe të shmangë angazhimet e tij”, tha Hossam Badran, anëtar i byrosë politike të Hamasit.
Zyrtari akuzoi Izraelin për mosrespektim të marrëveshjes, duke theksuar se sipas kushteve të marrëveshjes së ndërmjetësuar nga SHBA-të, Izraeli duhet të kishte rihapur kalimin e Rafah me Egjiptin ose të kishte rritur vëllimin e ndihmës që hynte në Rripin e Gazës nga territori i tij, por nuk e ka bërë këtë.
Badran shtoi se lëvizja islamiste palestineze u ka kërkuar vendeve ndërmjetëse t’i bëjnë presion Izraelit që të respektojë fazën e parë të marrëveshjes.
Armëpushimi mbetet shumë i brishtë, pasi të dyja palët akuzojnë njëra-tjetrën pothuajse çdo ditë për shkeljen e tij, gjë që është një shenjë e keqe për zbatimin e planit të paqes, për të cilin armëpushimi aktual është vetëm hapi i parë.
Qeveria izraelite thotë se faza e dytë e armëpushimit, që synon konsolidimin e armëpushimit me qëllim arritjen e një fundi përfundimtar të luftës, mund të fillojë vetëm pasi Hamasi të dorëzojë eshtrat e pengut të fundit izraelit të mbajtur në Rripin e Gazës që nga sulmi i grupit ndaj Izraelit më 7 tetor 2023.
Ndërkohë Izraeli do të rihapë kalimin kufitar Allenby me Jordaninë të mërkurën, për kalimin e mallrave dhe ndihmave, tha sot një zyrtar izraelit i sigurisë.
Kalimi kufitar ka qenë i mbyllur për kalimin e furnizimeve dhe mallrave me ndihma që nga shtatori, kur një shofer që transportonte ndihmë humanitare në Gaza hapi zjarr dhe vrau dy ushtarë izraelitë para se të neutralizohej nga forcat e sigurisë.
Zyrtari i sigurisë deklaroi se do të zbatohen kontrolle të rrepta në kalim për shoferët jordanezë dhe ngarkesat e transportuara me kamionë dhe se një forcë specifike sigurie do të vendoset në atë pikë.
Ura Allenby është një rrugë kyçe tregtare midis Jordanisë dhe Izraelit dhe e vetmja dalje për më shumë se 3 milionë palestinezë në Bregun Perëndimor të pushtuar nga Izraeli drejt Jordanisë dhe pjesës tjetër të botës.
Kalimi u rihap për udhëtarët menjëherë pas sulmit, por mbeti i mbyllur për kamionët me ndihma. Kombet e Bashkuara thonë se kalimi është një rrugë jetësore për transportimin e ushqimit, tendave dhe mallrave të tjera në Gaza.
Top Channel
