Tre anëtarë të një rrjeti trafikimi seksual që shfrytëzonte vajza të mitura bullgare dhe rumune në Selanik do të qëndrojnë në burg, pasi Gjykata Supreme e Greqisë rrëzoi apelimet e tyre.
Rrjeti u zbulua pasi një e mitur bullgare arriti të arratisej nga një apartament ku mbahej e mbyllur dhe raportoi ngjarjen në polici.
Sipas dëshmisë së saj, vajza ishte mashtruar nga partneri, i cili e kishte çuar nga Italia në Greqi me premtimin për punë, por më pas e kishte dorëzuar te shfrytëzues që e detyronin të ushtronte prostitucion nën dhunë dhe kërcënime. Ajo shfrytëzohej çdo ditë nga klientë të ndryshëm, ndërsa paratë i merrnin organizatorët e rrjetit. Trafikantët planifikonin ta dërgonin më tej në Gjermani për vazhdimin e shfrytëzimit, por e mitura arriti që të arratisej.
Në dëshminë e saj ajo ka pohuar se partneri e kishte dërguar në një shtëpi në Selanik ku ndodhej një vajzë shqiptare dhe dy burra. Në momentin që e mitura takohej me klientë, thotë se vajza shqiptare nuk ndodhej në banesë, por largohej.
Gjykata e Apelit në Selanik i shpalli tre të akuzuarit fajtorë për trafikim të të miturve me qëllim shfrytëzimin seksual dhe pjesëmarrje në grup të strukturuar kriminal, duke i dënuar me 5 deri në 15 vite burg. Ata apeluan vendimin, por Gjykata Supreme konstatoi se ankesa ishte e pabazuar dhe se dënimet ishin të justifikuara nga provat dhe rrethanat e çështjes.
Top Channel
