Merr dritën jeshile paketa fiskale, debat në Kuvend për skemën e TVSH dhe faljen e gjobave/ Braçe kritika për vonesat

Nga projektligji mbi skemën e TVSH, rivlerësimi, paqja fiskale, fshirja e detyrimeve tatimore dhe doganore e deri tek transaksionet në cash dhe sistemi i taksave vendore u votuan së fundmi nen për nen me pak ndryshime në komisionin e ekonomisë, punësimit dhe financave.

Duke nisur nga skema e rimbursimit të TVSH, ndonëse deputetët kërkuan zgjerimin e kategorive përfituese nëpërmjet amendimeve të paraqitura, projekt-ligji mori votat për në parlament nga shumica.

“Amendimet së pari kanë lidhje me futjen në këtë skemë të dy grupeve të rëndësishme që nuk përfitojnë nga skema e kompensimit. Propozoj në nenin 1 pika 1 dhe 3, të riformulohen.

-prodhuesit bujqësor që auto-faturohen nga subjektet e TVSH

-prodhuesit bujqësor që janë subjektet e TVSH dhe lëshojnë faturë shitje për produktet e shitura. Pjesë e rëndësishme e formalizuar e tregut dhe këta nuk përfitojnë sot.

-prodhuesit bujqësor që auto-faturohen nga biznesi vogël por s’janë subjekt I tvsh. Si pash baxhot dhe këta duhet të përfshihen.

Pika 3: kompensimi është I përmuajshëm dhe bëhet automatikisht nga organet tatimore në fund të muajit. Ndërkohë është bërë 1 herë në 6 muaj sipas parashikimit. Në nenin 4 fjalia 6 mujore të zëvendësohet me 1 mujore”, tha Eno Bozdo.

“Pozicioni ynë është që skema do qëndroj kjo që është se ne jemi në proces përafrimi me direktivat e BE dhe kështu siç jemi i përafrohemi lehtësisht”, u shpreh Endrit Yzeiraj-zëvendësministër i Financave.

“Propozimet o janë profesionale dhe merren parasysh dhe jo profesionale që nuk merren. Dhe propozime profesionale që s’merren parasysh këtu kemi parë. Kushtetuta thotë Taksat këtu I ndryshon kuvendi dhe jo qeveria”, deklaroi Erion Braçe-deputet i PS.

Miratimin mori dhe projektligji për fshirjen e detyrimeve tatimore dhe doganore si dhe marrëveshja e paqes fiskale pavarësisht propozimeve të deputetëve por me një ndryshim të propozuar nga deputeti Erion Braçe.

“Të përfshihen në skemën e lehtësimit edhe detyrimet e tjera vendore më të vjetra se 10 vite, që bizneset të kenë mundësinë t’i shlyejnë me pagesë të 50% të vlerës, ndërsa 50% e mbetur të falet”, tha Braçe.

Sa i përket rivlerësimit të pasurive të paluajtshme është tashmë e vendosur një normë 5%, ndërsa për procedurat tatimore bizneset s’do të kenë mundësinë më shumë se 100 mijë lekë cash dhe individët  500 mijë lekë. 3 projektligjet e mbetura morën miratimin ditën e martë.

Tashmë paketa fiskale është gati për tu miratuar apo jo në seancën plenare.

Top Channel