‘Unë nuk flas pa praninë e avokatit tim”, ky ka qenë reagimi i oficerit të policisë Jetmir Uta, menjëherë mbasi u vetdorëzua pak ditë mbas kërkimeve të bazuara në denoncimin e një vajze e cila thotë se u përdhunua.
Prokurorja pritet të kërkojë arrest me burg ndaj 24-vjeçarit, me detyrë agjent në seksionin për mbështetjen operacionale të hetimit në Policinë e Dibrës, raporton gazetarja e Top Channel, Anila Hoxha.
Hetimi kundër oficerit të policisë që dyshohet për marrëdhënie seksuale me dhunë me të rritura dhe shpërdorim detyre u hap nga Agjencia e Mbikëqyrjes Policore menjëherë mbasi një 19-vjeçare e shoqëruar nga e ëma denoncoi se ishte abuzuar seksualisht mbasi ishe shantazhuar dhe kërcënuar.
Fillimisht siç dyshon prokurorja e çështjes, oficeri Uta i ka shkruar në ‘Whats app’ denoncueses duke i thënë kam video dhe foto të tuat, nëse nuk më takon do ti publikoj”.
Mbas këtyre mesazheve, e reja ka pranuar ta takojë duke u larguar me makinën e tij. Në kallëzimin paraprak mësohet se ka patur kontradikta gjatë dëshmisë, sepse fillimisht 19 vjeçarja ka pohuar se është abuzuar në automjet e më pas në një hotel, ndaj kallëzimi mësohet se është riregjistruar në prani të psikologëve.
Gjatë kontrolleve policia e ka gjetur automjetin e kolegut të fshehur në banesën e kunatit të Utës, i cili gjithashtu është vendosur nën hetim për përkrahje të autorit të krimit. Ndërkohë që edhe nëna e 24-vjeçarit iu bashkua dosjes hetimore duke qenë se mbas ngjarjes, dyshohet se gruaja vizitoi familjen e vajzës së abuzuar dhe i kërcënoi ata duke ju kërkuar të tërhiqnin kallëzimin.
Top Channel
