Greqia paralizohet nga protestat e fermerëve, të cilët kanë nisur sot një valë bllokimesh në të gjithë vendin, që pritet të zgjasë deri më 5 dhjetor.
Si pjesë e këtyre mobilizimeve, më 30 nëntor 2025, nga ora 18:00 deri në 22:00 sipas orës greke, aksi rrugor Kakavijë–Janinë do të bllokohet plotësisht, duke ndërprerë qarkullimin për të gjitha automjetet, përveç atyre me emergjenca shëndetësore.
Lajmi është konfirmuar nga Policia Kufitare Kakavijë pas njoftimit zyrtar të autoriteteve greke.
Fermerët grekë, të vendosur të zbatojnë vendimet e mbledhjes kombëtare të zhvilluar në Nikaja të Larisës, kanë filluar të nxjerrin traktorët në rrugët kryesore dhe të bllokojnë pika strategjike të rrjetit rrugor, porte dhe dogana.
Këto protesta vijnë si reagim ndaj pagesave të vonuara, mungesës së dëmshpërblimeve, kostos së lartë të prodhimit dhe çmimeve të ulëta të produkteve bujqësore, si gruri, pambuku dhe misri.
Lëvizja ka nisur fuqishëm në Thesali, ku fermerët shprehen të zhgënjyer edhe nga mbështetja financiare e shpërndarë së fundi, e cila sipas tyre ka qenë shumë më e ulët se pritshmëritë.
Policia Kufitare Kakavijë u bën thirrje udhëtarëve për mirëkuptim dhe i këshillon të planifikojnë udhëtimet në orare të tjera, për të shmangur vonesat dhe bllokimet e shumta që priten në kufi dhe Greqi
Top Channel
