Lek Pepgjonaj, 29vjeç nga Puka ka rënë në prangat e policisë, pasi transportoi me varke drejt Tiranës drogë, eksploziv dhe municion luftarak me qëllim trafikimin drejt Kosovës.
Operacioni u zhvillua nga strukturat e DVP Kukës, në bashkëpunim me Komisariatin e Tropojës dhe me mbështetjen e Forcës së Posaçme “Shqiponja”.
Pas informacioneve operative se një shtetas po përgatiste transportimin e një ngarkese droge dhe eksplozivi drejt kufirit, u organizua ndjekja dhe më pas kapja e tij.
Në fshatin Dushaj, policia ndaloi automjetin tip “Volkswagen” që i dyshuari përdorte. Brenda në bagazh, të fshehur me kujdes, u gjetën 1.2 kilogramë kanabis, 405 gram tritol, 51 kapsolla detonatore, 5 metra fitil zjarrpërcjellës, sasi municioni luftarak, si edhe një shumë parash.
Hetimet tregojnë se i riu dyshohet se kishte kaluar ngarkesën me varkë nëpër liqen, nga fshati Apripë i Pukës deri në Tropojë, ku më pas kishte parkuar automjetin për t’iu shmangur kontrolleve.
Policia njofton se, në bashkëpunim me Prokurorinë dhe autoritetet homologe të Kosovës, po vijon puna për identifikimin dhe arrestimin e personit që pritej të blinte lëndët e paligjshme në territorin kosovar.
Materialet i janë referuar Prokurorisë për veprime të mëtejshme.
Top Channel
