Kryeministri i Australisë i jep fund beqarisë, Albanese i pari që kurorëzohet në detyrë: Jemi shumë të lumtur

Ceremonia u mbajt këtë të shtunë në Canberra, vetëm një ditë pas përfundimit të sesionit të fundit parlamentar për këtë vit.

“Jemi absolutisht të lumtur të ndajmë dashurinë dhe përkushtimin tonë për ta kaluar jetën së bashku, përpara familjarëve dhe miqve tanë më të afërt”, tha Albanese në një deklaratë të shkurtër, ku shprehu gëzimin për ditën e veçantë.

Çifti u fejua Ditën e Shën Valentinit vitin e kaluar, ndërsa propozimi dhe festa e martesës u zhvilluan në rezidencën zyrtare të kryeministrit, The Lodge. Për arsye sigurie, detajet e dasmës janë mbajtur të fshehta deri në momentin e fundit.

Në ceremoni morën pjesë prindërit e zonjës Haydon dhe djali i Albaneses nga martesa e parë. Qeni i kryeministrit, Toto, pati rolin e veçantë të mbajtësit të unazave, ndërsa çifti u prit me duartrokitje dhe nën tingujt e këngës së Stevie Wonder “Signed, Sealed, Delivered (I’m Yours)”.

Nga kabineti i qeverisë ishin të pranishëm disa ministra, ndërsa kënga e parë e çiftit në festë ishte “The Way You Look Tonight” e Frank Sinatrës. Pjesë e atmosferës festive ishin edhe kana të personalizuara birre me foton e fejesës së tyre.

Albanese dhe Haydon do të kalojnë muajin e mjaltit në Australi, me një udhëtim të shkurtuar për shkak të ri-zgjedhjes së tij në maj.

Kryeministri 62-vjeçar dhe partnerja e tij 47-vjeçare u njohën në një darkë biznesi në Melburn në vitin 2020, kohë kur ai drejtonte opozitën.

Që atëherë, Haydon ka qenë krah tij në fushatat zgjedhore të viteve 2022 dhe 2025, si dhe në aktivitete të rëndësishme shtetërore, përfshirë funeralin e Mbretëreshës Elizabeth II dhe një darkë shtetërore të ish-presidentit amerikan Joe Biden.

Albanese ka hyrë tashmë në historinë e Australisë edhe si kryeministri i parë që është fejuar dhe martuar gjatë mandatit.

Top Channel