Katastrofë në Azi, 600 të vdekur dhe mijëra të zhdukur pas përmbytjeve të frikshme 29/11 22:13
Bashkimi Europian ka reaguar ashpër ndaj shkeljeve të përsëritura të hapësirës ajrore të Moldavisë nga dronët rusë, duke i cilësuar ato të rrezikshme dhe të papranueshme.
Përfaqësuesja e Lartë e BE-së, Kaja Kallas, tha se këto incidente vënë në rrezik edhe trafikun ajror civil dhe kërkojnë përgjigje të menjëhershme.
“Shkeljet e hapësirës ajrore të Moldavisë nga dronët rusë janë të papranueshme dhe rrezikojnë trafikun civil. Këtë vit, BE po investon 20 milionë euro në mbrojtjen ajrore të Moldavisë për të forcuar sigurinë e vendit. Qielli i Moldavisë nuk mund të bëhet viktimë e luftës së Rusisë,” u shpreh Kallas.
Reagimi vjen pasi Moldavia u detyrua të mbyllte për rreth një orë hapësirën e saj ajrore mbrëmjen e kaluar, pas një tjetër ndërhyrjeje të dronëve që depërtuan nga drejtimi i konfliktit në Ukrainë.
Shkeljet janë bërë të shpeshta që prej pushtimit rus të Ukrainës në shkurt 2022. Vetëm këtë javë, autoritetet moldave raportuan rrëzimin e një droni në territorin e tyre, ndërsa gjithsej gjashtë mjete ajrore pa pilot kanë kaluar kufirin ajror të vendit brenda pak ditësh.
Autoritetet në Kishinau, në bashkëpunim me partnerët ndërkombëtarë, po shqyrtojnë masa shtesë për përmirësimin e mbrojtjes ajrore dhe për shmangien e rreziqeve të mëtejshme ndaj popullatës dhe infrastrukturës civile.
Top Channel
