Një burrë është paralajmëruar se përballet me një dënim të gjatë me burg pasi ndoqi një oficer policie me sharrë elektrike dhe u përpoq ta vriste atë.
Liridon Kastrati ishte akuzuar për përplasjen e një makine në një automjet policie dhe më pas ndoqi me sharrë elektrike oficerët më 6 maj të vitit të kaluar.
32-vjeçari mohoi një akuzë për përpjekje për të vrarë katër oficerë policie, por dje ai u shpall fajtor për një akuzë për tentativë vrasjeje në lidhje me një person, pas një gjyqi në Gjykatën e Lartë në Paisley.
Akuza e ndryshuar gjithashtu hoqi referencën për aksidentin me makinë.
Të hënën, Kastrati u lirua nga akuzat për thyerje të qetësisë, vjedhje të një makine dhe kundërvajtje rrugore kur prokuroria tërhoqi këto katër akuza, të cilat ai i kishte mohuar.
Kastrati do të dënohet më 19 dhjetor dhe gjykatësi Gallacher i tha atij të presë një “dënim të konsiderueshëm”.
Pamjet video të incidentit të tmerrshëm që u shfaqën në atë kohë tregonin Kastratin duke vrapuar në rrugë me sharrën elektrike në duar.
Duke dhënë dëshmi javën e kaluar, oficeri i policisë Cowan i tha gjykatës se, pas aksidentit, jastëkët e ajrit të makinës së policisë shpërthyen dhe një burrë doli nga dera e shoferit të VW-së, shikoi makinën e policisë dhe “filloi të ikte”.
Ai tha se iu afrua burrit me qëllim arrestimin e tij, por kur ai ishte “rreth 10 metra” larg, burri u kthye në automjetin e tij dhe nxori një sharrë elektrike përpara se ta ndiqte, duke bërtitur, “në dreq policia”.
Oficeri i policisë Cowan tha: “Mendova se nëse nuk krijoj distancë, ai do të më vrasë”.
Gjykata dëgjoi më parë se Kastrati u mor në pyetje më 6 maj pa praninë e një avokati dhe një përkthyesi shqiptar dhe iu referua vazhdimisht përplasjes si një “aksident me makinë” kur iu lexuan akuzat.
Kastrati është mbajtur në paraburgim që kur ndodhi aksidenti.
Dje, John Scullion, mbrojtësi i Kastratit, i tha jurisë: “Kastrati pranon se ai nxori një sharrë elektrike nga makina, ai u betua, ai plagosi PC Cowan, ai e drejtoi sharrën elektrike drejt oficerëve të tjerë gjatë këtij incidenti të frikshëm dhe shqetësues. Ju duhet ta dënoni atë për këto”
Megjithatë, Scullion pretendoi se hetimi i policisë ishte “i gabuar” dhe “i mungonte neutraliteti dhe objektiviteti”.
Juria dha një vendim pas tre orësh diskutimi.
“Ju jeni dënuar për një akuzë e cila i nënshtrohet një numri fshirjesh akuzash, por mbetet një akuzë shumë serioze. Ligji kërkon që unë të marr më shumë informacion mbi ju, por mund ta pranoni që gjykata në kohën e duhur do të vendosë një dënim të konsiderueshëm në lidhje me këtë incident shumë të rrezikshëm”, tha gjyqtari Gallacher.
“Guximi dhe vendosmëria e treguar nga oficerët, thjesht duke bërë punën e tyre dhe anëtari i publikut për të ndaluar shpejt Kastratin, siguruan që kërcënimi i rrezikshëm që ai paraqiste për komunitetin lokal të neutralizohej në vendngjarje. Shpresoj që dënimi i tij të sjellë pak ngushëllim”, tha Inspektori Detektiv, Jan MacColl.
“Dua të shpreh falënderimet dhe mirënjohjen time më të thellë për ata që janë përfshirë për trimërinë dhe profesionalizmin e tyre kur u përballën me një rrezik dhe urrejtje të tillë nga Kastrati, i cili qartësisht kishte për qëllim t’i dëmtonte.
Askush nuk duhet të përballet me këtë nivel të mjerueshëm kriminaliteti dhe kjo nuk do të tolerohet.
Ky lloj incidenti tregon situatat e paparashikueshme dhe të rrezikshme me të cilat mund të përballen oficerët e policisë, ndërsa bëjnë çmos për të mbajtur njerëzit të sigurt.
Kastrati nuk ka treguar asnjë pendim për veprimet e tij brutale dhe me të drejtë tani përballet me pasojat”, tha Kryeinspektorja Rhona Fraser.
Top Channel
