Trump reagon pas bisedës së publikuar mes të dërguarit të tij dhe zyrtarit rus: Witkoff po bënte gjënë e duhur, të ‘shiste’ planin e paqes te Moska dhe Kievi

Trump u tha gazetarëve të mërkurën se nuk e kishte dëgjuar audion, por se Witkoff po bënte “atë që bën një negociator” për të “shitur” planin e paqes si te Rusia, ashtu edhe te Ukraina.

Telefonata e publikuar nga muaji i kaluar doli në dritë disa ditë pasi një draft-plani paqeje me 28 pika i paraqitur nga SHBA-ja përputhej kryesisht me pozicionet ruse mbi luftën e saj të plotë në Ukrainë.

Witkoff ka vizituar disa herë Moskën këtë vit dhe javën e ardhshme do të takohet sërish me presidentin rus Vladimir Putin. Ai nuk ka zhvilluar bisedime në Kiev.

Ai nuk ka shkuar kurrë në Kiev në rolin e tij si i dërguar i posaçëm, megjithëse zyrtarë të tjerë amerikanë kanë vizituar vendin dhe sekretari amerikan i ushtrisë, Dan Driscoll, shkoi në Kiev këtë javë. Trump thotë se do të zhvillojë bisedime të tjera me ukrainasit.

Bisedimet diplomatike kanë vazhduar pasi drafti fillestar i planit u kritikua nga udhëheqësit ukrainas dhe europianë si tepër i favorshëm për Rusinë. Ndër propozimet ishte dorëzimi te Rusia i territorit të kontrolluar nga Ukraina në lindje të vendit.

Që atëherë plani është rishikuar për të pasqyruar më mirë interesat e Ukrainës dhe qëndrimet e aleatëve evropianë. Presidenti i Ukrainës, Volodymyr Zelensky, ka thënë se është gati të takojë Trump-in për të diskutuar “pikat e ndjeshme” që mbeten.

Në regjistrimin e publikuar, të siguruar dhe shpërndarë si transkript nga Bloomberg, Witkoff duket duke këshilluar Yuri Ushakovin, këshilltarin për politikë të jashtme të Putinit, se si të fitojë simpatinë e Trump-it.

BBC News nuk e ka verifikuar në mënyrë të pavarur telefonatën e 14 tetorit, por Trump tha se ajo përfaqësonte një “formë shumë standarde të negociatave”.

Gjatë bisedës së publikuar, të dy burrat raportohet se flasin për përfundimin e luftës, me Ushakov që pyet nëse do të ishte e dobishme që shefat e tyre, Putin dhe Trump, të flisnin.

Witkoff citohet të ketë thënë se po, dhe se “njeriu im është gati ta bëjë këtë”, para se të sugjerojë si duhet realizuar telefonata.

“Thjesht përsërisni që e uroni presidentin [Trump] për këtë arritje… që e respektoni si një njeri të paqes dhe që jeni vërtet të lumtur ta shihni këtë ndodhi,” citohet Witkoff të ketë thënë. “Mendoj se nga kjo telefonatë do të dalë shumë e mirë.”

“S’i kam thënë presidentit që ju, që Federata Ruse ka dashur gjithmonë një marrëveshje paqeje. Kjo është bindja ime,” shton Witkoff sipas transkriptit. “Çështja është se kemi dy vende që po e kanë të vështirë të arrijnë një kompromis.”

“Madje jam duke menduar që ndoshta ne të përgatisim një propozim paqeje me rreth 20 pika, njësoj siç bëmë në Gaza,” shton Witkoff.

Telefonata përfundon me Witkoff që i thotë Ushakovit për një vizitë të afërt të Zelensky-t në Shtëpinë e Bardhë dhe se “nëse është e mundur”, Trump dhe Putin duhet të flasin para atij takimi.

Ajo që pasoi ishte një telefonatë dy orë e gjysmë mes presidentëve amerikan dhe rus, lajmi për të cilën doli në momentin kur Zelensky ishte rrugës për në Uashington muajin e kaluar.

Para telefonatës Trump- Putin, presidenti amerikan dukej se po humbte durimin me homologun e tij rus dhe kishte sugjeruar se mund t’i jepte Ukrainës raketa me rreze të gjatë veprimi Tomahawk.

Por në momentin që Zelensky hyri në Shtëpinë e Bardhë, atmosfera dukej e ndryshuar. Trump tha se dhënia e Tomahawk-ve për Kievin mund ta përshkallëzonte konfliktin dhe se ai besonte që Putin “dëshiron ta përfundojë luftën”.

I pyetur për telefonatën e publikuar, Yuri Ushakov i tha medias shtetërore ruse se ajo ishte bërë “për të penguar, me shumë gjasë” dhe se ishte “e pamundur” të ishte bërë për të përmirësuar marrëdhëniet.

Ai gjithashtu konfirmoi se Witkoff do të vizitojë Moskën javën e ardhshme, sipas një “marrëveshjeje paraprake”.

Nuk ishte e qartë kush qëndronte pas rrjedhjes së informacionit, por Bloomberg kishte transkriptuar edhe një tjetër telefonatë të raportuar mes Ushakovit dhe të dërguarit të Putinit, Kirill Dmitriev, i cili kaloi disa ditë me Witkoff në Miami në fund të tetorit, disa javë para se të dilte plani me 28 pika.

Sipas transkriptit, Dmitriev i thotë kolegut të tij rus: “Ne thjesht do ta bëjmë këtë dokument nga pozicioni ynë dhe unë do ta kaloj në mënyrë joformale, duke e bërë të qartë se kjo është krejt joformale. Dhe pastaj le të bëjnë ata versionin e tyre.”

Dmitriev, i cili dukej i zemëruar nga raportimi, u ankua për një “makineri mediatike të mirëfinancuar, të mirëorganizuar dhe dashakeqe që synon të përhapë narrativa të rreme, të njollosë kundërshtarët dhe t’i mbajë njerëzit të hutuar”.

Top Channel