Analiza e CNN/ Plani i SHBA-së për përfundimin e luftës në Ukrainë, ja 3 çështjet kritike që mund të sjellin finalizimin e marrëveshjes ose fundin e negociatave 26/11 09:07
Presidenti amerikan, Donald Trump bëri deklarata të reja për proceset në vazhdim në lidhje me bisedimet për t’i dhënë fund luftës në Ukrainë, duke u përpjekur të ruante klimën e optimizmit që është krijuar, megjithëse bëri një hap prapa në lidhje me afatin kohor.
Siç u tha ai gazetarëve në Air Force One, plani 28-pikësh i hartuar nga SHBA-të ishte vetëm “një hartë” dhe jo një plan përfundimtar paqeje, pasi qeveria amerikane po bën “përparim” drejt arritjes së një marrëveshjeje midis Moskës dhe Kievit.
“E gjitha kjo ishte një hartë udhëzuese. Nuk ishte një plan. Ishte një ide. Ata morën secilën nga 28 pikat dhe pastaj dolën me 22 pika… Ne zgjidhëm shumë prej tyre, dhe në një mënyrë shumë të favorshme. Do të shohim se çfarë do ndodhë”, tha ai.
Presidenti tha se “kemi pasur bisedime të mira… Kemi pasur disa bisedime me Rusinë. Ukraina po ecën mirë. Mendoj se janë mjaft të kënaqur me këtë. Do të doja ta shihja këtë luftë të përfundonte… po bëjmë përparim.”
I pyetur në lidhje me lëshimet që Rusia duhet të bëjë, Trump tha se Moska tashmë po ofron “lëshime të mëdha”, duke shtuar: “Ata do ndalojnë së luftuari dhe nuk po pushtojnë më territor”.
“Është një proces i ndërlikuar. Nuk po ecën aq shpejt”, shtoi presidenti amerikan, duke vënë në dukje se Europa po shtyn për t’i dhënë fund konfliktit.
“Europa me të vërtetë dëshiron që ai të përfundojë sa më shpejt të jetë e mundur”. Shtoi Trump.
Kur u pyet nëse kishte një afat kohor, ai u përgjigj: “Afati kohor për mua është kur të mbarojë… Të gjithë janë lodhur nga luftimet”.
Trump njoftoi gjithashtu se i dërguari special i SHBA-së, Steve Witkoff, ishte planifikuar të takohej me Presidentin rus Vladimir Putin javën e ardhshme në Moskë, duke lënë të kuptohet gjithashtu mundësinë që dhëndri i tij të marrë pjesë në takim.
“Steve Witkoff do të jetë atje, ndoshta me Jared Kushner. Nuk jam i sigurt nëse Jared do të jetë atje, por ai është i përfshirë në proces, është një djalë i zgjuar dhe ata do të takohen me Presidentin Putin, besoj, javën e ardhshme në Moskë”, u tha Trump gazetarëve në Air Force One.
Top Channel
