Harry Kane ka hedhur poshtë zërat për një largim të mundshëm nga Bayern Munich, pavarësisht klauzolës së lirimit prej 56.7 milionë funtesh që mund ta lejojë të largohet verën e ardhshme.
Sulmuesi 32-vjeçar po kalon një sezon spektakolar, duke shënuar golin e tij të 26-të për klubin dhe kombëtaren në fitoren 6-2 ndaj Freiburg.
Sipas rregullit të klauzolës, Kane duhet të njoftojë dëshirën për t’u larguar përpara mbylljes së merkatos së janarit — diçka që vetë lojtari nuk e sheh të mundshme. Kur u pyet nga Bild nëse tifozët e Bayernit duhet të shqetësohen, kapiteni i Anglisë u përgjigj qartë: “Jo, nuk mendoj kështu.”
Barcelona shihet si klubi më i interesuar, duke kërkuar zëvendësues për Robert Lewandowskin, ndërsa një rikthim në Premier League mbetet gjithmonë një mundësi, pasi Kane është vetëm 48 gola larg rekordit historik të Alan Shearer.
Aktualisht, ai ndodhet përsëri në Londër pasi Bayern viziton Arsenalin të mërkurën në Champions League. Por spekulimet nuk e shqetësojnë aspak.
“Nuk kam pasur kontakte me askënd,” theksoi ai. “Jam shumë i lumtur në Mynih dhe e shihni nga mënyra si po luaj. Nuk kemi diskutuar ende për të ardhmen, por nuk ka asnjë nxitim.”
Kane tha se fokusi i tij është mbi ndeshjet e radhës dhe Botërori i verës, duke shtuar se është “shumë e pamundur që diçka të ndryshojë pas këtij sezoni.”
Top Channel
