Europol ka zhvilluar një hetim të udhëhequr nga Gjermania, që kishte në shënjestër një grup mercenarësh të paguar nga një rrjet kriminal për të rrëmbyer kreun e një bande shqiptare të drogës.
Operacioni u zhvillua në Danimarkë, Francë, Letoni dhe Mbretërinë e Bashkuar, ku u arrestuan katër persona, ndërsa dy të tjerë ishin dënuar më parë në Gjermani.
Të dyshuarit, disa prej të cilëve ish-ushtarë në një njësi ushtarake franceze, ishin të trajnuar dhe të pajisur profesionalisht. Ata dyshohet se kishin marrë pagesë për të rrëmbyer shqiptarin pas një konflikti për vjedhjen e disa ton kanabis me vlerë miliona euro.
Sipas Europolit, rasti lidhet me fenomenin e njohur si “Dhuna si Shërbim”, ku persona me përvojë ushtarake ofrojnë aftësitë e tyre për grupe kriminale.
Ekspertët paralajmërojnë se ish-luftëtarët që kthehen nga fronti në Ukrainë mund të përfundojnë të përfshirë në krime të tilla, duke krijuar rreziqe të reja për sigurinë në Europë.
Top Channel
