Thomas Tuchel ka lënë të hapur mundësinë që të këndojë himnin “God Save The King” në Botërorin e ardhshëm, pasi Anglia ka siguruar kualifikimin në finale me një ecuri pothuajse perfekte.
Trajneri gjerman, i cili mori drejtimin e kombëtares vitin e kaluar, kishte deklaruar se duhej “të fitonte të drejtën” për të kënduar himnin. I pyetur nëse tashmë e ka merituar këtë, ai tha se do ta marrë në konsideratë dhe se mund ta bëjë gjatë Botërorit të vitit të ardhshëm në SHBA, Kanada dhe Meksikë.
Çështja e këndimit të himnit ka qenë më herët temë debati në Angli, sidomos gjatë periudhës së Lee Carsley si trajner i përkohshëm, i cili u kritikua pasi nuk e këndonte para ndeshjeve. Por Tuchel shprehet se ndihet “i lumtur dhe i pranuar” nga vendi që tani përfaqëson dhe mund t’i bashkohet lojtarëve në ceremonitë para sfidave.
Teknikut gjerman i janë vlerësuar zgjedhjet taktike që prej marrjes së detyrës, edhe pse vendimi për të lënë fillimisht në stol Jude Bellingham ndaj Serbisë u pa si i diskutueshëm. Morgan Rogers, i preferuar në atë pozicion pas tre paraqitjeve të mira radhazi, mori vendin titullar dhe paraqitja e tij e justifikoi vendimin. Bellingham u fut në pjesën e dytë dhe pati ndikim pozitiv në lojë.
Tuchel shpjegoi se struktura e presingut me Declan Rice, Rogers dhe Harry Kane ka funksionuar shumë mirë dhe se ndryshimet taktike të fundit kërkojnë përshtatje nga çdo lojtar, përfshirë edhe yllin e Real Madridit. Ai tha se transparenca dhe rolet e qarta do të jenë vendimtare për një ekip që pritet të përballet me kushtet e vështira të turneut.
Trajneri theksoi se rëndësia e lojtarëve të stolit është po aq e madhe sa ajo e titullarëve, duke përmendur temperaturat e larta dhe ngarkesën e madhe të sezonit. Sipas tij, një skuadër e fortë kërkon që lojtarët të pranojnë vendimet, pavarësisht pakënaqësive personale. Ai kujtoi përvojën e tij te Chelsea, ku bashkimi i grupit, përfshirë edhe rezervat, ishte një nga faktorët kryesorë të suksesit.
Tuchel tha se synon të çojë në Botëror një grup të gatshëm të luftojë së bashku, ku çdo lojtar, pavarësisht minutave, të jetë i fokusuar te objektivi i përbashkët.
Top Channel
