Trajneri i Italisë, Gennaro Gattuso, është vënë përballë një problemi të rëndësishëm disiplinor vetëm pak ditë para ndeshjeve vendimtare të kualifikueseve për Kupën e Botës 2026.
Sandro Tonali nuk do të luajë të dielën kundër Norvegjisë në “San Siro”, pasi një karton i verdhë do ta përjashtonte nga ndeshja e parë e play-off-it. “Nuk mund ta rrezikojmë këtë,” deklaroi Gattuso në konferencë.
Në të njëjtën situatë ndodhen edhe Davide Frattesi dhe Andrea Cambiaso, por roli i tyre në skemat e trajnerit nuk është po aq vendimtar sa ai i Tonalit.
Planet para Moldavisë dhe Norvegjisë
Tonali pritet të jetë titullar në sfidën e së enjtes kundër Moldavisë. Edhe nëse ai ndëshkohet me karton të verdhë në këtë takim, do të humbiste ndeshjen me Norvegjinë, por do të ishte i disponueshëm për gjysmëfinalen e play-off-it në mars. Kjo llogaritje mbetet e vlefshme nëse Norvegjia, siç pritet, fiton ndaj Estonisë — rezultat që do ta bënte matematikisht të pamundur që Italia të kapë vendin e parë në grup.
Përjashtuar skenarët e rrallë, ndeshja e “San Siro”-s do të shërbejë si provë gjenerale për marsin, ku Gattuso pritet të testojë disa zgjidhje të reja. Në mesfushë, Barella — i pezulluar për sfidën kundër Moldavisë — do të rikthehet titullar, me një vend mes Locatellit dhe Ricci-t përkrah tij, ndërsa Cristante pritet të kompletojë treshen, duke kursyer Frattesin. Pezullimet do të fshihen pas këtyre ndeshjeve, çka shmang rrezikun për Tonalin dhe lojtarët e tjerë në play-off.
Italia dhe skenari i play-off-it: rivalë të mundshëm
Azzurrët janë tashmë të sigurt në vazon e parë për shortin e play-off-eve që do të mbahet në Cyrih më 20 nëntor. Italia do të përballet në gjysmëfinale me një prej ekipeve më të mira të Ligës së Kombeve që nuk janë kualifikuar, duke luajtur në shtëpi. Në finalen e mundshme, kundërshtari do të vijë nga përballjet mes ekipeve të vazo-s 2 dhe 3.
Ekipet aktualisht të pozicionuara për fazën eliminatore janë:
Vazo 1: Italia, Turqia, Ukraina, Polonia
Vazo 2: Republika Çeke, Hungaria, Sllovakia, Skocia
Vazo 3: Maqedonia e Veriut, Shqipëria, Bosnja, Kosova
Vazo 4: Uells, Rumani, Suedi, Irlanda e Veriut
Italia rrezikon përsëri përballje me Suedinë apo Maqedoninë e Veriut — dy kombëtaret që e eliminuan në edicionet e fundit të play-off-it. Megjithatë, panorama mund të ndryshojë pas dy raundeve të ardhshme, duke e bërë të pamundur çdo parashikim të sigurt.
Top Channel
