Ish-sulmuesi i njohur irlandez Robbie Keane po synon një rikthim të bujshëm te Wolverhampton Wanderers, këtë herë jo si lojtar, por si trajner i skuadrës angleze.
Sipas raportimeve të talkSPORT, Keane ka aplikuar për postin e trajnerit pas shkarkimit të Vitor Pereira-s, i cili u largua të dielën pas një fillimi katastrofik të sezonit. Wolves nuk ka arritur asnjë fitore në dhjetë ndeshjet e para të Premier League-s, duke grumbulluar vetëm dy pikë dhe ndodhen në fund të tabelës.
Keane, 45 vjeç, ka një lidhje të veçantë me Wolves, pasi ishte aty ku nisi karrierën e tij profesionale. Ai shënoi 27 gola në 85 paraqitje për klubin, përpara se të shkëlqente me Tottenham, Liverpool dhe Celtic.
Tashmë, pas një karriere të suksesshme si lojtar dhe një përvoje të konsoliduar si trajner, ish-ylli i Spurs po kërkon të marrë drejtimin e klubit ku gjithçka nisi.
Sipas SunSport, Gary O’Neil – ish-trajner i Wolves, i shkarkuar në dhjetor të kaluar – është gjithashtu në garë për një rikthim të mundshëm. Bisedimet mes palëve po ecin pozitivisht, pasi O’Neil vazhdon të vlerësohet lart nga drejtuesit e klubit.
Humbja 3–0 ndaj Fulham ka thelluar krizën e Wolves, dhe bordi është në kërkim të një figure që mund të shpëtojë sezonin përpara se të jetë tepër vonë.
Në karrigen e trajnerit, Keane vjen me një CV gjithnjë e më të pasur:
Ishte trajner-lojtar te ATK në Indi,
Më pas asistent i Kombëtares së Irlandës,
Trajner i Maccabi Tel Aviv, me të cilën fitoi kampionatin izraelit dhe Toto Cup,
Dhe këtë vit udhëhoqi Ferencvaros drejt titullit në kampionatin hungarez.
Ai është lidhur edhe me postin e trajnerit të Celtic, pas largimit të Brendan Rodgers, por një rikthim te Wolves do të ishte një histori e plotë cikli për të.
Ndërkohë, drejtuesit e klubit po konsiderojnë edhe Rob Edwards, aktualisht trajner i Middlesbrough, por një lëvizje e tillë do të kërkonte kompensim financiar.
Pavarësisht se kush do të zgjidhet, është e qartë se Wolves kanë nevojë urgjente për një shpëtimtar, dhe Robbie Keane duket gati t’i përgjigjet thirrjes së klubit që i hapi rrugën drejt famës.
Top Channel
