Një 20-vjeçar nga Kamza është vënë në pranga nga Policia e Tiranës, pasi mbante dhe përdorte padrejtësisht uniformën e Policisë së Shtetit, duke u paraqitur në publik si punonjës policie.
Gjatë një kontrolli në bulevardin “Nënë Tereza”, shërbimet e patrullës së Komisariatit të Policisë Nr. 5 ndaluan një automjet tip “Mercedes-Benz”, drejtuar nga shtetasi E. B., 20 vjeç, i cili ishte i veshur me uniformë dhe stema të ngjashme me ato të Policisë së Shtetit.
Pas verifikimeve, rezultoi se i riu nuk ishte pjesëtar i forcave të rendit, ndërsa gjatë kontrollit në banesën e tij u zbuluan materiale të shumta që përdoreshin për t’u maskuar si polic:
4 dokumente identifikimi me emra dhe foto të dyshuara të falsifikuara;
1 armë sportive e tipit pistoletë me 2 krehra;
Uniformë e Policisë së Shtetit;
16 stema dhe grada të ndryshme;
3 kapele me shenja policore.
Policia njofton se vijon puna hetimore për të zbuluar nëse 20-vjeçari ka qenë i përfshirë në veprimtari të tjera të paligjshme, përmes përdorimit të këtyre pajisjeve dhe dokumenteve të falsifikuara.
Në përfundim të veprimeve, E. B. u arrestua në flagrancë, ndërsa materialet procedurale iu referuan Prokurorisë për veprime të mëtejshme.
Top Channel
