Notarja transgjinore Ana Caldas, 47 vjeç, është pezulluar për pesë vjet nga Federata e Notit për shkak se nuk pranoi të bënte një test për verifikimin e gjinisë.
Për shkak të Caldas nisi edhe një hetim Prokurori i Përgjithshëm i Teksasit, Ken Paxton, ndaj US Masters Swimming, pasi në fillim të këtij viti, ajo garoi në Kampionatin Botëror Masters 2024 në kategorinë e grave të seniore. Por Caldas, e cila njihet edhe me emrin Hannah dhe ka lindur në Portugali, por që përfaqëson Amerikën, refuzoi t’i nënshtrohej kontrollit të verifikimit të gjinisë si pjesë e hetimit të World Aquatics mbi të drejtën e tyre për pjesëmarrje.
Si rezultat, World Aquatics tani e ka ndaluar Caldas deri në tetor 2030 dhe të gjitha rezultatet midis qershorit 2022 dhe tetorit 2024 i janë zeruar. Në përgjigje të këtij hetimi dhe vendimi, Caldas tha: “Testet kromozomale janë procedura invazive dhe të kushtueshme. Sigurimi im refuzon të mbulojë një test të tillë sepse nuk është i nevojshëm nga ana mjekësore. Asnjë shtet i SHBA-së nuk kërkon teste gjenetike për ngjarje sportive rekreative si këto. As US Masters Swimming, organi kombëtar i qeverisës për notin rekreativ për të rritur në SHBA, nuk e kërkon këtë për asnjë nga aktivitetet e tij.”
Caldas vazhdoi: “Unë i kuptoj dhe i pranoj pasojat. Por një pezullim pesëvjeçar është çmimi që duhet të paguaj për të mbrojtur informacionin tim më intim mjekësor. Jam e lumtur ta paguaj atë çmim, për veten time dhe për të gjitha gratë që nuk duan t’i nënshtrohen testeve invazive.” Ndalesa nga organi qeverisës global i sportit vjen dy muaj pasi US Masters Swimming i lejoi Caldas të garonte në kategoritë e femrave në ngjarjet e tyre. Prokurori i Përgjithshëm i Teksasit, Paxton, paditi US Masters Swimming këtë verë pasi Caldas dhe një grua tjetër transgjinore, Jennifer Rines, u lejuan të garonin në Kampionatin Kombëtar të Pranverës në prill.
Top Channel
