Nga miliarderët e kriptovalutave te anëtarët e kabinetit/ Cilët janë donatorët që do të paguajnë sallën e ballove të Trump? 24/10 11:58
Autoritetet meksikane njoftuan të enjten se 48 qese me pjesë nga trupa njerëzish ishin gjetur në një vendgrumbullim sekret pranë Guadalajarës.
Hetimi është duke vazhduar, tha zyra e prokurorit, duke shmangur publikimin e çdo vlerësimi të numrit të viktimave.
“Ne duhet të vazhdojmë nga një këndvështrim mjeko-ligjor për të qenë në gjendje t’ju themi se sa viktima përmbajnë qeset”, shpjegoi Blanca Trujillo, prokurorja e shtetit, gjatë një konference për shtyp.
Varri sekret u zbulua katër javë më parë nga një kolektiv që kërkon të zhdukurit në një parcelë toke të zbrazët në Zapopan, një periferi të zonës metropolitane të Guadalajarës.
Pas zbulimit makabër, autoritetet filluan procesin e rikuperimit dhe identifikimit të mbetjeve në bashkëpunim me anëtarët e këtij kolektivi, të njohur si Guerreros Buscadores, “Kërkuesit Luftues”.
Ky rast iu shtua dhjetëra rasteve të ngjashme në shtetin e Jaliscos, i cili është shkatërruar nga Karteli i Gjeneratës së Re të Jaliscos (JNGC), i cili u caktua si “organizatë terroriste e huaj” nga administrata e Presidentit të SHBA-së, Donald Trump në fillim të këtij viti.
Sipas Uashingtonit, kjo bandë, së bashku me Kartelin Sinaloa, është ndër trafikantët kryesorë të fentanilit, një opioid sintetik që ka shkaktuar dhjetëra mijëra vdekje nga mbidoza në SHBA.
Meksika ka regjistruar më shumë se 127,000 zhdukje, shumica e tyre që nga viti 2006, kur qeveria e atëhershme federale nisi të ashtuquajturën “luftë” kundër karteleve të drogës, duke vendosur ushtrinë brenda vendit, një qasje që është kritikuar nga shumë njerëz.
Në qershor, ekspertët mjeko-ligjorë identifikuan mbetjet e 34 personave të gjetur në një lagje në Zapopan.
Sipas të dhënave zyrtare, më shumë se 15,900 njerëz janë zhdukur dhe janë shpallur të zhdukur në Jalisco.
Top Channel
