Përfaqësuesit e Marc Guehi-t janë takuar me drejtuesit e Bayern Munich për një kalim të mundshëm të mbrojtësit anglez në verën e ardhshme, pasi lojtari ka vendosur të largohet nga Crystal Palace.
Mbrojtësi i kombëtares angleze ishte shumë pranë një transferimi te Liverpool gjatë merkatos së verës, por marrëveshja dështoi në ditën e fundit të afatit kalimtar. Pavarësisht kësaj, Guehi mbetet i vendosur të largohet nga Selhurst Park, ndërsa trajneri Oliver Glasner ka konfirmuar se lojtari nuk ka ndërmend të rinovojë kontratën.
Marrëveshja aktuale e Guehi-t me Palace skadon në verën e vitit 2026, dhe disa klube të mëdha europiane po ndjekin nga afër situatën e tij.
Sipas “Sky” në Gjermani, Bayern Munich tashmë ka zhvilluar bisedime me kampin e lojtarit. Drejtori sportiv i klubit bavarez, Max Eberl, raportohet se është takuar me agjentin e Guehi-t, Gordon Stipic, në Mynih ditët e fundit.
Bayern po kërkon përforcime në qendër të mbrojtjes, në rast se Dayot Upamecano ose Kim Min-Jae largohen nga skuadra. Megjithatë, kampionët gjermanë pritet të përballen me konkurrencë të fortë nga Liverpool, që ende është i interesuar për lojtarin, si dhe nga Real Madrid, i cili gjithashtu e ka në listën e dëshirave.
Nëse transferimi i Guehi-t nuk realizohet, Bayern ka si alternativë mbrojtësin e Borussia Dortmund, Nico Schlotterbeck.
Marc Guehi po kalon një periudhë të shkëlqyer në karrierë, pas fitores historike të Crystal Palace në finalen e Kupës FA ndaj Manchester City në maj. Interesimi për të është rritur ndjeshëm gjatë vitit të fundit, me Newcastle dhe Liverpool që kanë bërë përpjekje për ta transferuar – përfshirë edhe një ofertë prej 65 milionë paundësh nga Newcastle në janar, e refuzuar nga Palace.
Top Channel
