Polonia paralajmëron Putinin: Mos kalo nga hapësira jonë ajrore për të takuar Trumpin, do zbatojmë urdhër-arrestin ndërkombëtar

Trump tha javën e kaluar se planifikon të takohet me Putinin në kryeqytetin hungarez, Budapest, si pjesë e përpjekjeve të tij për të ndërmjetësuar përfundimin e luftës në Ukrainë.

Gjykata Ndërkombëtare Penale, me seli në Hagë, lëshoi në vitin 2023 një urdhër arresti kundër Putinit, duke e akuzuar atë për krime lufte lidhur me deportimin e paligjshëm të qindra fëmijëve nga Ukraina. Rusia nuk e njeh juridiksionin e Gjykatës dhe i mohon akuzat.

“Nuk mund të garantoj që një gjykatë e pavarur polake nuk do t’i urdhërojë autoritetet të shoqërojnë avionin deri në ulje për t’ia dorëzuar të dyshuarin gjykatës në Hagë,” tha ministri i Jashtëm i Polonisë, Radoslaw Sikorski, për radion Rodzina.

Urdhri i Gjykatës Ndërkombëtare Penale detyron vendet anëtare të saj ta arrestojnë Putinin nëse ai shkel në territorin e tyre.

“Mendoj se pala ruse është e vetëdijshme për këtë. Prandaj, nëse ky samit do të zhvillohet – shpresojmë me pjesëmarrjen e viktimës së agresionit – avioni duhet të përdorë një rrugë tjetër,” shtoi Sikorski.

Hungaria, kryeministri i së cilës Viktor Orban mban marrëdhënie të ngrohta me Rusinë, ka thënë se do të sigurojë që Putini të mund të hyjë në vend për samitin dhe të kthehet në shtëpi më pas.

Megjithatë, për të shmangur fluturimin mbi Ukrainë, delegacioni rus do të duhet të kalojë nëpër hapësirën ajrore të të paktën një vendi të Bashkimit Evropian. Të gjitha vendet e BE-së janë anëtare të Gjykatës Ndërkombëtare Penale, megjithëse Hungaria është në procesin e largimit nga Gjykata.

Polonia, anëtare e NATO-s, ka qenë një nga mbështetëset më të vendosura të Kievit që nga pushtimi i plotë i Ukrainës nga Rusia në vitin 2022.

Top Channel