Netanyahu: Izraeli hodhi 153 ton bomba në Rripin e Gazës të dielën 20/10 22:59
Gjykata Supreme e SHBA do të shqyrtojë ligjin që ndalon përdoruesit e drogave të mbajnë armë.
Në një vendim që ka përçarë prej kohësh opinionin publik në Shtetet e Bashkuara, Gjykata Supreme vendosi të hënën të shqyrtojë nëse ligji që ndalon përdoruesit e rregullt të drogave të paligjshme të mbajnë armë është në përputhje me Kushtetutën.
Edhe pse administrata e Presidentit Donald Trump mbron Amendamentin e Dytë të Kushtetutës, i cili garanton të drejtën për të mbajtur armë, ishte vetë ajo që iu drejtua Gjykatës Supreme për të kërkuar një vendim mbi kushtetutshmërinë e ligjit, pasi ai u rrëzua më herët nga një gjykatë apeli.
Ky është ligji në bazë të të cilit Hunter Biden, djali i ish-Presidentit Joe Biden, u dënua në qershor 2024 për posedim të paligjshëm të armëve. Ai u shpall fajtor për deklarim të rremë në formularin e blerjes së një arme në vitin 2018, ku kishte deklaruar se nuk ishte përdorues droge. Presidenti Joe Biden e fali të birin në dhjetor 2024.
“Kufizimet e pajustifikuara të së drejtës për të mbajtur armë përbëjnë një kërcënim serioz për liritë e amerikanëve. Megjithatë, ka disa raste të rralla kur qeveria mund ta kufizojë këtë të drejtë,” tha John Sauer, këshilltari ligjor i qeverisë amerikane, duke theksuar se ligji në fjalë është një nga këto përjashtime.
Sipas tij, përdoruesit e rregullt të drogave të paligjshme përbëjnë një rrezik të veçantë për shoqërinë, pasi “ekziston një rrezik serioz i konflikteve të armatosura me policinë kur ata janë nën ndikimin e drogës.”
Një tjetër rast për armët në Gjykatën Supreme
Ky është rasti i dytë që lidhet me armët, i cili pritet të dëgjohet nga Gjykata Supreme gjatë këtij viti.
Rasti i parë ka të bëjë me nëse është e lejueshme të mbash armë të fshehura në vende të konsideruara “të ndjeshme”, si plazhe, parqe publike apo bare.
Edhe pse nuk është përcaktuar ende një datë për dëgjimin e dy rasteve, Gjykata pritet të japë vendimin përfundimtar deri në fund të qershorit.
Në qershor 2022, Gjykata Supreme vendosi se qytetarët kanë të drejtë të mbajnë armë edhe jashtë shtëpive të tyre, duke sqaruar se mund të vendosen vetëm kufizime “të arsyeshme” në bazë të Amendamentit të Dytë, veçanërisht për zonat e ndjeshme.
Megjithatë, gjykatat më të ulëta kanë pasur vështirësi në interpretimin dhe zbatimin e kësaj direktive. Për këtë arsye, Gjykata Supreme u rikthye në qershor 2024 me sqarime të reja, duke vendosur se është kushtetuese çarmatimi i personave që përbëjnë “një kërcënim të besueshëm për sigurinë fizike të të tjerëve”, përfshirë rastet e dhunës në familje.
Top Channel
