Pas një periudhe të vështirë me kritika dhe mungesë minutash, Armando Broja është rikthyer me forcë.
Sulmuesi i kombëtares shqiptare u aktivizua si zëvendësues në miqësoren ndaj Jordanisë, por arriti të lërë gjurmë duke shënuar një gol dhe dhënë një asist. Një paraqitje që tregon se 24-vjeçari po rikthehet gradualisht në formën e tij më të mirë.
Por lajmet e mira për Brojën nuk ndalen këtu. Sipas mediumit anglez “Burnley Express”, sulmuesi kryesor i Burnley-t, Lyle Foster, ka pësuar një dëmtim gjatë grumbullimit me kombëtaren e Afrikës së Jugut, duke vënë në dyshim praninë e tij në ndeshjen e fundjavës ndaj Leeds United në Premier League.
Nëse Foster nuk do të jetë gati, kjo pritet të jetë mundësia e artë për Brojën që të rikthehet titullar me fanellën e Burnley-t dhe të tregojë vlerat e tij në elitën e futbollit anglez.
Me moralin e ngritur pas paraqitjes së mirë me Shqipërinë, sulmuesi kuqezi do të kërkojë të shfrytëzojë çdo minutë për të bindur trajnerin dhe për të konsoliduar vendin e tij në formacionin bazë.
Top Channel
