Paul Scholes ka deklaruar se Anglia “nuk ka asnjë shans” për të fituar Kupën e Botës pa Jude Bellingham, Phil Foden dhe Jack Grealish.
Trioja ishte surprizë e madhe pasi Thomas Tuchel i la jashtë skuadrës për ndeshjet e fundit ndërkombëtare kundër Uellsit dhe Letonisë.
Megjithatë, Anglia arriti një fitore të lehtë 3-0 ndaj uellsianëve dhe më pas mundi Letoninë 5-0, duke siguruar kualifikimin për Botërorin e vitit 2026.
Megjithatë, mungesa e Bellingham, Foden dhe Grealish ende ka ngjallur habi tek tifozët, veçanërisht pas fillimeve të forta të sezonit nga Foden dhe Grealish. Tuchel tha se Bellingham nuk ishte plotësisht i gatshëm pas rikuperimit nga një dëmtim në shpatull.
Scholes u shpreh i “befasuar” që Tuchel nuk përfshiu trio-n në skuadër, duke theksuar se ata duhet të jenë në ekip për turneun në SHBA, Kanada dhe Meksikë, nëse Anglia dëshiron të ngrejë trofeun.
Në një intervistë për The Overlap përmes Sky Bet, Scholes tha: “Isha pak i befasuar. Ata tre lojtarë, veçanërisht së bashku me Adam Wharton, duhet të jenë në skuadrën e Tuchel dhe do të jenë për Botërorin. Nëse shikon skuadrën aktuale, mund të thuash se ata kanë praktikisht asnjë shans për të fituar Kupën e Botës. Edhe me këta tre lojtarë – që janë disa nga më të mirët e Anglisë – sfida mbetet e madhe, por shton shanset për të fituar trofeun.”
Scholes shtoi se Bellingham tani është i gatshëm për lojë dhe duhet të përfshihet në ndeshjet e mbetura përpara Botërorit: “Thomas Tuchel nuk ka shumë ndeshje deri në fillimin e Botërorit. Ka vetëm pushimin e nëntorit dhe atë të marsit, pastaj fillon turneu, kështu që kemi nevojë që këta lojtarë të luajnë.”
Para fillimit të pushimit ndërkombëtar, Tuchel u detyrua të mbrojë vendimet e tij për të lënë jashtë Bellingham, Foden dhe Grealish.
Trajneri theksoi se nuk ka asnjë problem me lojtarët dhe se thjesht dëshironte të mbante një grup të ngjashëm nga kampi i fundit: “Jo. Nuk ka asnjë problem me Phil Foden apo Jack Grealish,” tha Tuchel në konferencë për shtyp.
Ai shtoi për BBC Sport: “Kjo është vendimi, pavarësisht nëse u pëlqen apo jo. Ata e dinë vlerësimin tim dhe e shoh qartë se sa i mirë është Phil për Manchester City. Jack e di që e shoh ndikimin e tij te Everton dhe se po arrin versionin më të mirë të vetvetes.”
Top Channel
