E shpallur nga FBI-ja si terroristja e parë grua për vrasjen e një polici, vdes në Kuba kumbara e Tupac Shakur 26/09 22:56
Donald Trump përsëriti të hënën thirrjen e tij për gratë shtatzëna dhe fëmijët e vegjël që të ndalojnë përdorimin e qetësuesit të dhimbjeve pa recetë Tylenol, pavarësisht kritikave nga organizatat shëndetësore dhe ofroi “këshilla” të reja që nuk mbështeten nga prova shkencore.
Në një konferencë emergjente për shtyp në Shtëpinë e Bardhë të hënën, Trump e lidhi autizmin me vaksinimet e fëmijërisë dhe Tylenol-in e marrë nga gratë shtatzëna, duke bërë pretendime që nuk mbështeten nga prova shkencore.
Sot, në një postim në platformën Truth Social, presidenti republikan bëri përsëri thirrje që vaksina kundër fruthit, shytave dhe rubeolës të “ndahet” në tre doza të veçanta dhe që fëmijët të mos vaksinohen për hepatitin B para moshës 12 vjeç. Zakonisht, kjo vaksinë administrohet brenda 24 orëve të para pas lindjes.
“Gra shtatzëna, mos e përdorni Tylenol përveç nëse është absolutisht e nevojshme, mos u jepni Tylenol fëmijëve tuaj të vegjël për asnjë arsye, ndani vaksinën MMR në tre doza të veçanta (jo të përziera), merrni vaksinën kundër lisë së dhenve veçmas, merrni vaksinën e hepatitit B në moshën 12 vjeç e lart dhe, më e rëndësishmja, vaksinohuni në 5 vizita të veçanta mjekësore”, shkroi Trump.
Këshilla e Trump bie ndesh me atë të shoqatave mjekësore, të cilat citojnë të dhëna nga studime të shumta dhe dekada praktike që tregojnë se acetaminofeni, përbërësi aktiv në Tylenol, është i sigurt kur ilaçi përdoret nën mbikëqyrje mjekësore gjatë shtatzënisë. Dhjetëra shoqata dhe grupe mjekësh, studiuesish dhe kujdestarësh të personave autikë dënuan njoftimet e Shtëpisë së Bardhë.
Ekspertët e shëndetit thonë se shtytja për vizita të shumta te mjeku është një telash i panevojshëm që ka të ngjarë të çojë në mbulim më të ulët të vaksinimit dhe të provojë të jetë një pengesë për shumë njerëz. Postimi i sotëm dhe njoftimet e së hënës kujtojnë takimet e rregullta informuese të Trump në muajt e parë të pandemisë Covid-19, kur ai shpesh jepte këshilla që nuk mbështeteshin nga shkenca. Ndër të tjera, ai kishte pyetur nëse do t’i ndihmonte pacientët të pinin zbardhues dhe kishte promovuar trajtime që nuk dukeshin se u sillnin dobi atyre.
Drejtori i Instituteve Kombëtare të Shëndetit, i emëruar nga Trump këtë vit, u shfaq në disa media për të deklaruar se nuk ka lidhje të provuar midis Tylenol dhe autizmit dhe për t’i nxitur gratë shtatzëna të konsultohen me mjekët e tyre. Deklarata me shkrim e lëshuar nga Administrata Amerikane e Ushqimit dhe Barnave (FDA) ishte e ngjashme.
Top Channel
