Protesta dhe festa në botë pas sulmeve ndaj Iranit, 23 të vrarë në Pakistan, përplasje pranë konsullatës amerikane 01/03 22:59
Pas plot 19 muajsh pa një takim ballë për ballë, Princi Harry dhe Mbreti Charles u takuan privatisht këtë muaj në Clarence House, në atë që u përshkrua si një “takim i ngrohtë, por zyrtar”.
Pavarësisht përqafimeve dhe shkëmbimit të dhuratave, burime pranë Pallatit Mbretëror kanë zbuluar për “The Sun” se nuk ka asnjë plan konkret për rikthimin e Harry-t në detyra mbretërore, as edhe në një rol “gjysmë brenda, gjysmë jashtë” siç ishte përfolur.
Sipas burimeve të gazetës britanike, takimi zgjati 53 minuta, gjatë të cilave babë e bir shkëmbyen përqafime, puthje në faqe dhe dhurata simbolike:
Princi Harry i dhuroi babait një foto të familjes së tij me Meghan, Archie dhe Lilibet.
Mbreti Charles, nga ana tjetër, i dhuroi të birit një dhuratë për ditëlindjen, vetëm gjashtë ditë përpara se Harry të mbushte 41 vjeç.
Por pavarësisht atmosferës miqësore, Harry mbeti i habitur nga formaliteti i takimit, duke e përshkruar vetë si “më shumë si një vizitë zyrtare, sesa një moment familjar”.
Spekulimet që ky takim mund të çonte në rikthimin e Harry-t në detyra mbretërore u hodhën poshtë menjëherë nga të dyja palët. Burime nga Pallati thanë se nuk ekziston asnjë plan për ta parë Harry-n në publik përkrah Mbretit, apo për të ndjekur ndonjë rol gjysmë zyrtar në monarki.
Për më tepër, burime të afërta me Harry-n theksojnë se ai nuk kërkon më të rikthehet në rolin mbretëror, por dëshiron vetëm pajtim me familjen. Ai e konsideron Monteciton në Kaliforni si shtëpinë e tij, ku jeton me Meghan dhe fëmijët.
Zëdhënësi i Harry-t: “Vizita kishte për qëllim mbështetjen e kauzave të tij humanitare dhe takimet me familjen e miqtë. Nuk ka pasur asnjë lëvizje për të ndarë Mbretin nga Princi William.”
Burim nga Princi William: “Raportimet për ndasi mes Mbretit dhe Princit të Uellsit janë të pavërteta. Janë marrëdhënie të pandryshuara.”
Përkundër mungesës së planeve për të ardhmen, Mbretit Charles i ka lënë derën hapur për takime të tjera private, nëse Harry viziton sërish Mbretërinë e Bashkuar. Kjo vizitë, megjithëse e shkurtër dhe e rezervuar, tregon se komunikimi mes babait dhe birit nuk është ndërprerë – por gjithashtu dëshmon se ndarja mes “Sussex-ëve” dhe pjesës tjetër të familjes mbretërore vazhdon të jetë e thellë.
Ndërkohë që Harry nuk ka folur me vëllanë e tij William që nga varrimi i Mbretëreshës Elizabeth II, ai vazhdon të shprehë dëshirën për pajtim – por pa pranuar rikthim në jetën zyrtare të monarkisë.
Top Channel
