Dëshmi të rreme për ndërhyrjen ruse në zgjedhjet presidenciale në 2016, prokurorët federalë drejt padisë ndaj ish-drejtorit të FBI-së

Burime të njohura me hetimin thanë se prokurorët kanë vetëm disa ditë kohë për të paraqitur çështjen përpara se të skadojë afati pesëvjeçar ligjor për ngritjen e akuzës. Nëse juria e madhe pranon ta miratojë padinë, kjo do të shënonte një nga veprimet më të rëndësishme ligjore kundër një ish-zyrtari të lartë gjatë mandatit të dytë të Presidentit Donald Trump.

Hetimi, që është intensifikuar javët e fundit, është bërë edhe më i ndjeshëm politikisht pas shkarkimit të Erik Siebert, ish-Prokurorit të SHBA-së që mbikëqyrte çështjen. Në vend të tij, Trump emëroi Lindsey Halligan, ish-avokate personale e tij, si Prokurore të Përkohshme. Halligan është parë ditët e fundit në selinë e Departamentit të Drejtësisë në Aleksandri.

Comey, i cili nuk është zyrtarisht i akuzuar, ka mohuar çdo keqbërje dhe ka deklaruar se ka qenë i sinqertë në dëshmitë e tij. Avokatët e tij nuk kanë komentuar publikisht mbi hetimin.

Presidenti Trump ka kritikuar publikisht ritmin e hetimeve dhe ka kërkuar më shumë agresivitet nga Departamenti i Drejtësisë kundër atyre që ai i konsideron si pjesë e “shtetit të thellë”, përfshirë vetë Comey-n.

Kujtojmë se Comey u shkarkua nga Trump në vitin 2017, pas mosmarrëveshjeve për hetimin e ndërhyrjes ruse. Ai ka qenë më pas një kritik i hapur i Trump dhe një figurë e kontestuar në debatin politik amerikan.

Në të kaluarën, një raport nga Inspektori i Përgjithshëm i DOJ-së kishte konstatuar se Comey kishte shkelur politika të brendshme të FBI-së për ruajtjen dhe shpërndarjen e memorandumeve, por nuk kishte gjetur prova për shpërndarje të informacionit të klasifikuar.

Vendimi për ngritjen e padisë pritet brenda pak ditësh, ndërsa vëmendja publike dhe politike ndaj çështjes po rritet ndjeshëm.

Top Channel