Njohja e shtetit palestinez në Asamblenë e OKB-së, reagon Shtëpia e Bardhë: Shpërblim për terroristët e Hamasit 22/09 20:46
Një aktivist britaniko-egjiptian, i cili u dënua me 15 vite burg gjatë protestave në Kajro, është falur nga presidenti egjiptian.
Alaa Abd El Fattah u bë një nga aktivistët më të shquar gjatë protestave të vitit 2011 që çuan në rrëzimin e ish-presidentit Hosni Mubarak. Në vitin 2014, ai u dënua me 15 vite burg, dënim që më vonë u reduktua në pesë.
Aktivisti u lirua në vitin 2019, por u arrestua sërish për një postim në Facebook në lidhje me shkeljet e të drejtave të njeriut në burgjet egjiptiane, çka çoi në një tjetër dënim 5-vjeçar në vitin 2021 për “përhapjen e lajmeve të rreme”.
Sot, avokati i tij, Khaled Ali, përmes një deklarate në Facebook, njoftoi lajmin e faljes nga presidenti. “Zoti është gjykatësi. Presidenti i Republikës ka lëshuar një dekret që fal Alaa Abd El Fattah. Urime!“, shkroi ai.
Presidenti deklaroi se gjithashtu janë falur edhe pesë të burgosur të tjerë, por ende nuk është e qartë se kur do të lirohen.
Gjatë qëndrimit të tij të dytë në burg, familja e aktivistit ka pohuar se kushtet në të cilat ai jetonte ishin të këqija, pasi nuk ekspozohej ndaj diellit dhe nuk kishte mundësi të lexonte apo të ushtronte aktivitet fizik.
Avokati u përpoq ta lironte atë edhe më herët, në vitin 2024, duke argumentuar se dy vitet e paraburgimit të klientit të tij duhet të llogariteshin, por prokurorët kundërshtuan dhe thanë se ai nuk do të lejohej të dilte deri në janar të vitit 2027.
Refuzimi nga prokurorët e shtyu nënën e tij të fillonte një grevë të gjatë urie në shtator të vitit të kaluar, por i dha fund pas disa muajsh, pas lutjeve të familjes së saj të shqetësuar se kishte humbur 35 kg dhe ishte sëmurë rëndë.
Top Channel
