Në Tiranë vizita e Altin Dumanit kreut të SPAK në Departamentin Amerikan të shtetit disa ditë më parë u komentua në mënyra nga më të ndryshmet.
Vetë SPAK nuk dha asnjë detaj për qëllimin e takimit.
Por Departamenti Amerikan i Shtetit i është përgjigjur interesimit të gazetarit të Top Channel Muhamed Veliu, se çfarë ishte diskutuar gjatë takimit mes Brendan Hanrahan, zyrtar i lartë në Byronë për Çështjet Evropiane dhe Euroaziatike në Departamentin e Shtetit me kreun e SPAK dy ditë më parë.
Një zëdhënës i DASH në përgjigjen për Top Channel përmes postës elektronike tha:
Dublim mbulohet me përgjigjen e e-mailit -“Shtetet e Bashkuara po punojnë me Shqipërinë për qëllimet tona të përbashkëta të ndalimit të trafikut të drogës, krimit të organizuar dhe migracionit të parregullt. Zyrtarë të lartë të Departamentit u takuan me Kreun e Prokurorisë së Posaçme (SPAK), Dumani, për të diskutuar fusha të bashkëpunimit me përfitim të ndërsjellë”
Brendan Hanrahan është zyrtari i lartë në Byronë për Çështjet Evropiane dhe Euroaziatike (EUR) në Departamentin e Shtetit të SHBA-së. Ky pozicion është përgjegjës për udhëheqjen e politikave dhe marrëdhënieve diplomatike të SHBA-së me shtetet e Evropës dhe Euroazisë.
Në këtë rol, Hanrahan raporton drejtpërdrejt te Sekretari i Shtetit, Marco Rubio.
Ky emërim është pjesë e një riorganizimi të brendshëm në Departamentin e Shtetit, i cili synon përputhjen e politikave të administratës Trump me një fokus të theksuar në diplomacinë ekonomike dhe një angazhim të rishikuar me rajonin e Ballkanit Perëndimor.
Pak përpara largimit nga detyra ish sekretari amerikan i shtetit Antony Blinken në një ceremoni në Washington e shpalli Altin Dumanin kampion i antikorrupsionit nga Departamenti Amerikan i Shtetit. Kreu I SPAK, ishte pjesë e listës me 10 emra për vitin 2024. Sekretari amerikan i shtetit Antony Blinken gjatë ceremonisë tha se numri një i kësaj liste ishte Dumani. Blinken theksoi se numri një i prokurorisë së posaçme antikorrupsion ka bërë një punë të jashtëzakonshme në luftën kundër korrupsionit pasi ka goditur politikanë të lartë dhe grupe të shumta kriminale.
Top Channel
