Kim Jong Un niset drejt Kinës me tren të blinduar për paradën ushtarake historike në Pekin 01/09 18:07
Getty Images
Australia do të ndalojë përdorimin e mediave sociale për fëmijët nën 16 vjeç duke filluar nga dhjetori, por një raport i ri paralajmëron se metodat e zbatimit sjellin rreziqe për privatësinë dhe saktësinë e verifikimit të moshës.
Ligji i ri detyron platformat si Facebook, Instagram, Snapchat dhe YouTube të ndërmarrin “hapa të arsyeshëm” për të parandaluar të miturit të krijojnë ose të përdorin llogari. Kompanitë që nuk zbatojnë rregullat mund të përballen me gjoba deri në 50 milionë dollarë australianë.
Raporti i publikuar nga Skema e Certifikimit të Kontrollit të Moshës thekson se verifikimi përmes dokumenteve zyrtare është metoda më e saktë, por ngre shqetësime serioze për ruajtjen dhe ndarjen e të dhënave personale.
Po ashtu, teknologjia e njohjes së fytyrës doli e pasaktë për adoleshentët pranë moshës kufi, duke sjellë rrezik për gabime që mund të bllokojnë përdorues të ligjshëm ose të lejojnë fëmijë të vegjël.
Ministrja e Komunikacionit, Anika Wells, tha se nuk ka një zgjidhje të vetme, por kërkoi nga gjigantët e teknologjisë të përdorin mjetet që kanë për të mbrojtur fëmijët:
“Është e arsyeshme që këto kompani, të cilat janë në pararojë të inteligjencës artificiale, të garantojnë që fëmijët të jenë të sigurt në internet.”
Megjithëse sondazhet tregojnë se shumica e australianëve e mbështesin ndalimin, ekspertët e shëndetit mendor paralajmërojnë se masa mund t’i izolojë fëmijët nga lidhja sociale ose t’i shtyjë drejt hapësirave të tjera të rrezikshme e të parregulluara online.
Top Channel
