Çfarë solli takimi mes Xi Jinping dhe Narendra Modit në Kinë? CNN: Lideri kinez dhe ai indian folën për miqësi ‘mes kaosit’ teksa tarifat e Trump ashpërsohen 31/08 20:02
Presidenti rus Vladimir Putin dhe kryeministri indian Narendra Modi janë ndër liderët kryesorë që marrin pjesë në një nga samitet më të rëndësishme të Organizatës së Bashkëpunimit të Shangait (SCO), që po mbahet në qytetin portual Tianjin të Kinës.
Samiti po zhvillohet në një atmosferë të ngarkuar politike dhe ekonomike, mes tensioneve në rritje me Shtetet e Bashkuara.
Modi, i cili po qëndron për herë të parë në Kinë pas shtatë vitesh, ka zhvilluar një takim bilateral me presidentin kinez Xi Jinping, në përpjekje për të zbutur tensionet e akumuluara ndër vite mes dy vendeve fqinj. Ndërkohë, Putin, një aleat i ngushtë i Kinës, mbërriti të dielën në Tianjin mes një pritjeje zyrtare me qilim të kuq.
Organizata e Bashkëpunimit të Shangait – e krijuar në vitin 2001 nga Kina, Rusia dhe katër vende të Azisë Qendrore – numëron aktualisht 10 shtete anëtare, përfshirë Pakistanin dhe Iranin, si dhe 16 vende partnere dhe vëzhguese. Edhe pse ky samit konsiderohet më shumë si simbolik, ai ofron një platformë të rëndësishme për vendet pjesëmarrëse që të shprehin shqetësimet dhe interesat e tyre strategjike të përbashkëta.
Këtë vit, takimi po mbahet në sfondin e luftërave tregtare me SHBA-në. Presidenti amerikan Donald Trump ka vendosur tarifa të larta ndaj mallrave indiane si ndëshkim për blerjet e vazhdueshme të naftës ruse nga Delhi. Ndërkohë, Rusia përballet me kërcënime të reja sanksionesh për shkak të luftës në Ukrainë.
Për qytetin Tianjin, samiti është shndërruar në një festë gjigante. Banderola dhe tabela të shumta promovuese janë vendosur në çdo cep të qytetit, ndërsa në mbrëmje, mijëra qytetarë mblidhen përgjatë lumit për të ndjekur shfaqjet e dritave që projektohen në kulla. Masa të rrepta sigurie janë vendosur në të gjithë zonën qendrore, me kufizime të forta për qarkullimin e makinave dhe këmbësorëve.
Autoritetet lokale kanë këshilluar mbi 13 milionë banorët e qytetit që të kufizojnë lëvizjet e panevojshme gjatë ditëve të samitit dhe të furnizohen me artikuj të nevojshëm pranë banesave të tyre.
Takimi zhvillohet vetëm pak ditë para paradës së madhe ushtarake që do të shënojë 80-vjetorin e përfundimit të Luftës së Dytë Botërore, një tjetër ngjarje me peshë politike për rajonin dhe më gjerë.
Top Channel
