Putin kërcënon Europën nga “shtëpia” e udhëheqësit kinez, nuk e përmend asnjëherë Trump-in: Le të kujtojnë historinë

Në intervistën shumë të gjatë, mungojnë dy fjalë. Siç ndodh gjithmonë para një udhëtimi të tij në Kinë, Vladimir Putin i dha një intervistë agjencisë Xinhua, gjatë së cilës foli për aktualitetin gjeopolitik dhe gjendjen e botës, pa përmendur asnjëherë Shtetet e Bashkuara.

Një rrethanë e çuditshme duke pasur parasysh çfarë ndodhi muajin e kaluar mes Alaskës dhe Uashingtonit, por krejtësisht e kuptueshme, nëse merret parasysh publiku dhe atyre që  po i drejtohej presidenti rus.

Pasi tha fjalë të mira për mikpritësin Xi Jinping, të cilin e quajti “udhëheqës i vërtetë i një fuqie të madhe me vizion të gjerë strategjik”, si dhe marrëdhënieve ekonomike mes Moskës dhe Pekinit që kanë arritur “një nivel të paparë”.

“Ne dhe Kina ndajmë interesa të gjera të përbashkëta dhe opinione jashtëzakonisht të ngjashme për çështje themelore. Jemi të bashkuar në vizionin tonë për të ndërtuar një rend botëror të drejtë dhe multipolar, me vëmendje të veçantë ndaj kombeve të Shumicës globale”.

Por presidenti rus tregoi edhe vendin ku duhet të nisë ndryshimi, nëse jo përmbysja, e raporteve të forcës.

Duke iu referuar me zgjuarsi rezolutës “Shfarosja e kolonializmit në të gjitha format dhe shfaqjet e tij”, të miratuar nga Asambleja e Përgjithshme e OKB-së më 4 dhjetor 2024, Putin tha se Rusia dhe Kina “mbështesin reformën e OKB-së në mënyrë që t’i rikthehet plotësisht autoriteti dhe të pasqyrojë realitetet moderne”, duke shpresuar për një reformë të Këshillit të Sigurimit, “për ta bërë më demokratik, duke përfshirë shtete nga Azia, Afrika dhe Amerika Latine”.

Shqiponja me dy koka, simboli i Rusisë, ka qenë gjithmonë simetrike vetëm në dukje. Për një kohë të gjatë në historinë e saj mijëravjeçare ajo ka parë vetëm nga perëndimi. Por pas rënies së Bashkimit Sovjetik, dhe shumë përpara Putinit, ajo u kthye nga Lindja. Që në vitin 1993, Koncepti i politikës së jashtme ishte dokumenti i parë zyrtar që e njohu Azinë si “një nga qendrat e politikës dhe ekonomisë botërore”, duke deklaruar se për t’u bërë aktore në atë zonë, Rusisë do t’i mjaftonte “të shmangte riprodhimin e përvojave europiane në rajon”.

Lindja e një hapësire të madhe euro-aziatike është pra një ide e vjetër ruse, së cilës Xi iu bashkua si aksioner shumice, duke u bërë referent jo vetëm i Brics, por i një zone të zgjeruar në Amerikën Latine dhe Afrikë që kundërshton të ashtuquajturin rend të vjetër botëror.

“Eurazia pa Perëndimin: Kina do të tregojë një botë të re”. Është një program i plotë titulli i editorialit të agjencisë shtetërore Ria Novosti që hap vizitën kineze të Putinit.

“Po, është një sfidë. Ose më mirë, një mospajtim ndaj Perëndimit, dhe para së gjithash ndaj Shteteve të Bashkuara, që janë vetëshpallur njëanshëm përgjegjës për sigurinë globale. Periudha koloniale e sundimit të tyre në Azi ka mbaruar prej kohësh, por ndikimi dhe interesat e tyre nuk janë zhdukur. Atlantistët vazhdojnë të duan ‘t’i kullosin popujt’ e Azisë, t’i drejtojnë, t’i shfrytëzojnë kundërthëniet e tyre dhe herë pas here t’i vënë hapur kundër njëri-tjetrit”.

Putin nuk e la pa theksuar hendekun që tashmë ndan dy realitetet.

“Në Rusi, nuk do ta harrojmë kurrë rezistencën heroike të Kinës. Shohim që në disa shtete perëndimore rezultatet e Luftës së Dytë Botërore në fakt po rishikohen. Militarizmi japonez po ringjallet me pretekstin e kërcënimeve imagjinare ruse ose kineze, ndërsa në Europë, përfshirë Gjermaninë, po ndërmerren hapa drejt rimilitarizimit të kontinentit, me pak vëmendje ndaj paralelizmit historik”.

Do të ishte gjithçka normale, sikur këtë verë Kremlini të mos i kishte buzëqeshur gjerësisht SHBA-ve të Donald Trump, me një takim dhe foto historike në Anchorage, “që i lejojnë Putinit të shkojë tek aleati i tij kryesor jo si vasal, por si udhëheqës botëror që flet baraz me presidentin e Shteteve të Bashkuara, rivali kryesor i Kinës”, siç thonë shumë opinionistë të pavarur rusë.

Edhe për këtë arsye, mungesa e çdo referimi ndaj SHBA-ve duket si një shmangie e qëllimshme, një temë e sikletshme për t’u evituar. Së bashku me presidentët e Indisë, Iranit, Turqisë dhe shteteve të tjera me të cilat Shtëpia e Bardhë ka marrëdhënie problematike, Putin do të jetë i ftuari i nderit në samitin e Organizatës së Bashkëpunimit të Shangait që do të mbahet nga sot deri më 1 shtator në Tianjin.

Një lloj “Shtetesh të përgjithshme” të ashtuquajturit Jugu Global, të bashkuara edhe nga një dozë e mirë anti-amerikanizmi, të cilit do t’i pasojë parada për 80-vjetorin e fitores kineze në Luftën e Dytë Botërore.

“Që nga viti 2021, tregtia dypalëshe me Pekinin është rritur me rreth 100 miliardë dollarë” deklaroi presidenti rus. “Ne ruajmë fort pozicionin tonë si eksportuesi kryesor i naftës dhe gazit drejt Kinës” shtoi ai, duke ia njohur kështu meritën vendit që i ka lejuar t’i mbijetojë sanksioneve.

“Në vitin 2027, parashikojmë të hapim një tjetër rrugë të rëndësishme gazi, të ashtuquajturën rruga e Lindjes së Largët” ishte njoftimi i mëtejshëm.

Në të njëjtën kohë, Putini është njeriu që sapo është takuar me armikun e shpallur të Kinës dhe që planifikon marrëveshje të mëdha arktike dhe po aq marrëveshje me Shtetet e Bashkuara. Shqiponja ruse po bën lëkundje. Kush e di çfarë mendon vërtet Xi Jinping.

Top Channel