Gaza në krizë urie, Izraeli: Nuk do të ndalojmë luftimet për të lejuar hyrjen e ndihmave! 29/08 22:48
Presidenti ukrainas Volodymyr Zelensky ka hedhur poshtë idenë për krijimin e një zone neutrale midis forcave ukrainase dhe ruse si pjesë e një marrëveshjeje paqeje, duke argumentuar se kjo nuk pasqyron realitetin e luftës.
“Vetëm ata që nuk kuptojnë teknologjinë e luftës së sotme, propozojnë një zonë neutrale“, deklaroi ai në një konferencë për shtyp këtë të premte.
Komentet e tij vijnë pas raportimeve se disa liderë evropianë po shqyrtojnë një zonë sigurie prej 40 kilometrash si pjesë e një armëpushimi apo marrëveshjeje afatgjatë. Por, Zelensky theksoi se një zonë e tillë “tashmë ekziston”, për shkak të kërcënimit të sulmeve me dron afër vijës së frontit.
“Armët e rënda nga të dyja palët ndodhen në një distancë më shumë se 10 kilometra nga njëra-tjetra, sepse gjithçka goditet nga dronët. E quaj ‘zonë e vdekur’, disa e quajnë ‘zonë gri’, por ekziston tashmë“, shtoi ai.
Zelensky refuzoi gjithashtu mundësinë që Ukraina të heqë dorë nga territori brenda kësaj zone.
Ndërkohë, përpjekjet diplomatike të udhëhequra nga SHBA duket se po humbasin vrullin. Një takim i rëndësishëm i zhvilluar javën e kaluar midis presidentit amerikan Donald Trump, presidentit ukrainas, Volodymyr Zelensky dhe liderëve evropianë ngjalli shpresa për një samit të mundshëm me presidentin rus Vladimir Putin, por këto shpresa po zbehen.
Top Channel
