Shtëpia e Bardhë shpërthen ndaj Politico-s pas artikullit për të dërguarin special të Trump, Vance: Gazetari e dobët dhe operacion me ndikim të huaj 29/08 23:01
Një tragjedi ka ndodhur pranë brigjeve të Mauritanisë, Afrikë, ku të paktën 69 emigrantë humbën jetën pasi anija me të cilën po udhëtonin u përmbys në det.
Sipas kreut të rojës bregdetare, Mohamed Abdallah, ngjarja ndodhi të martën në mbrëmje, rreth 80 kilometra në veri të kryeqytetit Nouakchott. Ai shpjegoi se pasagjerët në bord panë dritat e një qyteti bregdetar dhe u grumbulluan në njërën anë të barkës, duke bërë që ajo të humbasë ekuilibrin dhe të përmbyset.
“Kur emigrantët panë dritat e Mheijrat-it, u drejtuan të gjithë nga një anë e barkës dhe kjo e përmbysi atë”, tha Abdallah për mediat.
Barka kishte lundruar nga Gambia rreth një javë më parë dhe mbante rreth 160 persona, shumica shtetas të Gambias dhe Senegalit.
Fillimisht u raportuan 49 viktima, por më pas numri u rrit në 69, pas një bilanci të ri nga autoritetet. Vetëm 17 persona arritën të mbijetojnë, pasi u shpëtuan nga një patrullë e rojës bregdetare.
Rrugët e rrezikshme drejt Europës
Ky incident është vetëm një prej shumë tragjedive që ndodhin çdo vit përgjatë rrugëve të rrezikshme që ndjekin emigrantët afrikanë për të arritur në Europë. Sipas Organizatës Ndërkombëtare për Migracionin (IOM), të paktën 8,938 persona humbën jetën në përpjekje për të kaluar kufijtë gjatë vitit 2024.
Emigrantët që kalojnë nga Mauritania zakonisht vijnë nga vende si Senegali dhe Mali, dhe synojnë të arrijnë në Europë përmes detit. Por rreziku nga rrymat e fuqishme detare dhe gjendja e dobët e anijeve i bën udhëtimet shumë të rrezikshme. Disa të tjerë ndjekin rrugën përmes shkretëtirës Sahara, e cila përbën 90% të territorit të Mauritanisë, duke përballuar temperatura mbi 45°C.
Akuza për abuzime ndaj emigrantëve
Një raport i publikuar këtë javë nga organizata Human Rights Watch ka ngritur shqetësime të mëdha për mënyrën si trajtohen emigrantët në Mauritani. Në raportin prej 142 faqesh, HRW denoncon përdorimin e “forcës së tepruar nga policia, kufizime të dhimbshme dhe mungesë ushqimi e uji” gjatë ndalimeve dhe deportimeve të emigrantëve.
Këto praktika, sipas raportit, janë intensifikuar pas një marrëveshjeje me Bashkimin Europian prej 210 milionë eurosh, që synon të frenojë emigracionin ilegal që nga viti 2024.
Autoritetet mauritane ende nuk kanë reaguar ndaj raportit, i cili ka shkaktuar debat të gjerë si në qarqet qeveritare, ashtu edhe ato humanitare.
Top Channel
