Forcat e Posaçme të Policisë së Shtetit kanë finalizuar me sukses një tjetër operacion për kapjen e shtetasve të shpallur në kërkim ndërkombëtar.
Operacioni policor, i koduar “Operacionalja 64”, çoi në arrestimin e dy vëllezërve nga Divjaka, të dënuar në Itali për përfshirje në një organizatë kriminale dhe trafik droge.
Në pranga kanë rënë: Roland Metushi, 47 vjeç dhe Saimir Metushi, 45 vjeç
Të dy shtetasit, të cilët jetonin në Divjakë, ishin shpallur në kërkim ndërkombëtar nga autoritetet italiane.
Gjykata e Novarës në Itali i ka dënuar në tetor 2024 për veprat penale “Organizatë kriminale” dhe “Trafikim i lëndëve narkotike”. Saimir Metushi është dënuar me 7 vite burg, ndërsa Roland Metushi me 5 vite.
Operacioni u organizua nga Drejtoria e Forcës së Posaçme Operacionale në Departamentin e Policisë Kriminale, bazuar në informacionet e siguruara mbi vendndodhjen e tyre.
Materialet procedurale për arrestimin provizor të dy shtetasve i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Fier, me qëllim ekstradimin e tyre drejt Italisë.
Ndërkohë, Interpol Tirana, në bashkëpunim me Interpol Romën, po vijon procedurat për ekstradimin.
Top Channel
