Takimi Putin-Zelensky? Ministri i Jashtëm rus: Presidenti është i hapur për dialog, por duhen përgatitje 19/08 17:03
Gjeneva po shihet gjithnjë e më shumë si vendi i mundshëm ku mund të zhvillohet një samiti i paqes mes Vladimir Putin dhe Volodymyr Zelensky, një ide e propozuar fillimisht nga presidenti francez, Emmanuel Macron.
Pas vizitës së tij në Shtëpinë e Bardhë, Macron deklaroi se samiti duhet të mbahet në një “vend neutral, ndoshta në Zvicër – unë po shtyj për Gjenevën – ose në një tjetër shtet.” Ai theksoi për LCI/TF1 se “nuk është vetëm një hipotezë, por vullnet i përbashkët i liderëve.”
Ministri i jashtëm zviceran, Ignazio Cassis, konfirmoi këtë mëngjes se vendi i tij mund të organizojë takimin, duke u mbështetur tek roli i veçantë i Zvicrës dhe statusi i Gjenevës si selia evropiane e OKB-së.
Megjithatë, ekziston një pengesë madhore: si firmëtare e Statutit të Romës, Zvicra është e detyruar ligjërisht të arrestojë Putinin për shkak të urdhër-arrestit ndërkombëtar. Cassis la të kuptohet se mund të gjendet një rrugëdalje përmes imunitetit të përkohshëm, me qëllim që të mundësohen bisedimet e paqes.
Samiti i mundshëm në Gjenevë shihet si një hap i madh diplomatik, nëse arrihet të realizohet, duke vendosur Zvicrën sërish në qendër të skenës ndërkombëtare si ndërmjetëse neutrale.
Top Channel
