“Ishte mirë, papritur…”/ Foshnja 10 muajshe vdes papritur gjatë pushimeve në Turqi! Prindërit kërkojnë ndihmë për ta kthyer trupin në Itali 14/08 15:07
Banorët të ndarë mes entuziazmit për vizitën e profilit të lartë dhe frikës për atë që mund të bien dakord liderët amerikanë e rusë.
Do të jetë një nga fundjavat e fundit të mira verore në Anchorage, Alaska – kulmi i sezonit të salmonit dhe mesi i sezonit të manaferrave – dhe banorët shpresojnë që samiti i së premtes mes Donald Trump dhe Vladimir Putin të mos ua prishë planet.
“Pres me padurim të nxjerr varkën në ujërat e Prince William Sound – ky është plani im,” tha Andy Moderow, i cili punon në një organizatë jofitimprurëse për ruajtjen e natyrës në Anchorage.
Jeff Landfield, pronar i faqes së lajmeve Alaska Landmine, tha: “Kemi pasur një verë goxha të mirë. Duke përfunduar projekte, duke dalë për gjueti, peshkim, kamping, dhe xhiro me ‘four-wheeler’. Por sezoni po mbyllet, kështu që kam parë disa njerëz të thonë: ‘Shpresoj të mos më prishin planet.’”
Qyteti më i madh i Alaskës, Anchorage ndodhet më në veri se Oslo dhe Shën Petersburgu. Me një popullsi pak nën 300 mijë banorë, qendra e tij e ulët ndodhet mbi kënetat me baltë të Cook Inlet, në bazën e maleve Chugach. Lagjet shtrihen në rrugë të gjera mes qendrave tregtare dhe grupeve të thupërve; dyqanet e qendrës shesin punime artizanale të popujve vendas të Alaskës dhe suvenire me ari e drerë.
“Nuk duam të bëhemi pjesë e asaj që po ndodh atje,” tha Colleen Heaney-Mead, e cila drejton një qendër kujdesi për fëmijë në Anchorage. “Nuk kemi pse të bëjmë çdo gjë që bëjnë ata.”
Samiti i së premtes nuk do të jetë hera e parë që qyteti shërben si skenë për diplomaci të profilit të lartë. Presidenti i Kinës, Xi Jinping, u ndal në qytet në vitin 2017, ku darkoi me salmon dhe supë gaforre në rrugën e kthimit nga një takim me Trump në Florida.
Dy vite më vonë, Anchorage ishte vendi i një takimi të tensionuar mes diplomatëve kinezë dhe zyrtarëve të administratës Biden, të cilët u qortuan publikisht mbi shkeljet e të drejtave të njeriut dhe racizmin sistemik.
Por këtë herë, ndjesia është ndryshe.
Në Alaska, Rusia nuk është një armik abstrakt por një fqinj i afërt; avionët e saj shpesh afrohen në hapësirën ajrore të Alaskës, dhe thuhet se qeveria e saj dëmton peshkatarët e Alaskës. Banorët e Anchorage janë të ndarë mes entuziazmit për një vizitë të profilit të lartë dhe frikës për kuptimin e saj.
“E ndien sikur Anchorage është rikthyer në hartë, çka mendoj se të gjithë e pëlqejnë disi,” tha Hollis French, ish-senator i shtetit dhe anëtar i Komisionit të Naftës dhe Gazit të Alaskës.
“Megjithatë, darkova mbrëmë me dy miq, dhe të gjithë ishim disi pesimistë dhe skeptikë. E di, do të thoja se presim që Trump të bëjë diçka të tmerrshme.”
Njoftimi i Trump se do të takonte Putinin “në Rusi” ndezi alarm në një rajon që ishte pjesë e perandorisë ruse deri në shitjen e tij tek SHBA në vitin 1867.
“Ka një reagim satirik që kanë Alaskanët: ‘Ju lutem mos na shisni prapë’,” tha Heaney-Mead.
Moderow, i cili u rrit teksa i afroheshim fundit të luftës së ftohtë, tha se strehimoret kundër bombave dhe stërvitjet bërthamore ishin disa nga kujtimet e tij të para, edhe pse politikanë të Alaskës, si kandidatja për zëvendëspresidente në 2008 Sarah Palin, ndonjëherë e ekzagjerojnë afërsinë mes dy vendeve.
“Rusia është një fqinj,” tha ai. “Nëse je rritur në shtet, je i vetëdijshëm për Rusinë dhe afërsinë e saj – edhe pse Sarah Palin e teproi pak në debat.”
French u pajtua, duke thënë: “E dimë që ata janë fqinjë armiqësorë. E dimë që testojnë mbrojtjen tonë dhe ne reagojmë siç duhet. Mendoj se shumica e njerëzve e kuptojnë që udhëheqësi i vendit nuk është mishërimi i kombit. Por \[Putin] me siguri i ka popullin e tij të nënshtruar. Prandaj mendoj se Alaskanët janë të kujdesshëm ndaj tij.”
Landfield përmendi lidhjet e hershme kulturore mes Rusisë dhe Alaskës, përfshirë programet e shkëmbimit universitar dhe “Besimtarët e Vjetër”, një sekt i kishës ortodokse ruse që erdhi në Alaska nga rusët që iknin nga persekutimi ndër vite. “Njerëzit nuk e pëlqejnë Putinin. Nuk është puna për Rusinë apo rusët,” tha ai. “Nuk mendoj që Rusia është armiku ynë.”
Matt Acuña Buxton, një gazetar politik me përvojë në Anchorage, tha se ekziston “një pakënaqësi e gjerë” që Putini – i cili është subjekt i një urdhër-arresti nga gjykata ndërkombëtare penale (ICC) – po viziton qytetin.
“Shumë Alaskanë e kuptojnë mirë që Putini dhe administrata e tij nuk janë miqtë e Alaskanëve,” tha ai.
Shtëpia e Bardhë ka treguar se samiti do të mbahet në bazën ushtarake në veri-lindje të Anchorage, gjë që ka zhgënjyer vendasit, sipas Mead, pasi “gjithçka që ndodh në bazë nuk është sikur ndodh vërtet në Alaska”.
Kjo nuk i ka ndaluar banorët e Anchorage të japin ide të tjera: 49% e të anketuarve në një sondazh të Alaska Landmine sugjeruan që dy liderët botërorë të takoheshin “në shtëpinë e Sarah Palin”.
Një tjetër buletin, Alaska Memo, propozoi që Trump dhe Putin të ngjiteshin në malin Flattop, “takimi tipik romantik i zonës së Anchorage”, ose të qëndronin në Skinny Dick’s Halfway Inn në rrugën për në Fairbanks.
“Momentalisht është një ambient i pasur me meme,” tha Landfield. “Në fund të fundit, në pamje të madhe, kjo ka të bëjë me Ukrainën,” tha ai për takimin Trump-Putin. “Por për Alaskanët, është thjesht një mundësi për të rrotulluar sytë pak dhe për të bërë disa shaka.”
Top Channel
