Diplomatë veteranë dhe figura kyçe të ekonomisë, zbulohet delegacioni i Kremlinit që do të shoqërojë Putinin në Alaskë për takimin me Trump

Lista e delegacionit prej pesë anëtarësh hedh dritë mbi temat që pritet të dominojnë axhendën, duke përfshirë jo vetëm çështje të sigurisë ndërkombëtare dhe luftën në Ukrainë, por edhe diskutime mbi sanksionet ekonomike dhe investimet ndërkombëtare.

Delegacioni i Kremlinit përbëhet nga:

Yuri Ushakov – ndihmës presidencial dhe ish-ambasador në SHBA

Sergei Lavrov – Ministër i Jashtëm, me mbi 20 vjet përvojë në këtë detyrë

Andrei Belousov – Ministër i Mbrojtjes, i emëruar rishtazi me profil ekonomik

Anton Siluanov – Ministër i Financave

Kirill Dmitriev – Drejtor i Fondit Rus për Investime të Drejtpërdrejta (RDIF)

Lavrov dhe Ushakov janë figurat më të spikatura të diplomacisë ruse dhe pjesë kyçe në formulimin e politikës së jashtme të Kremlinit, duke sinjalizuar një qasje klasike diplomatike në këtë takim.

Përfshirja e ministrave Belousov dhe Siluanov, që përfaqësojnë sektorët e mbrojtjes dhe financave, sugjeron se bisedimet do të prekin edhe çështje të sigurisë strategjike, ndoshta në lidhje me armët bërthamore, si dhe potencialin për lehtësim të sanksioneve që kanë goditur ekonominë ruse pas pushtimit të Ukrainës.

Ndërkohë, Kirill Dmitriev, një figurë me lidhje të ngushta me familjen Putin dhe me përvojë në ndërtimin e marrëdhënieve me botën e biznesit ndërkombëtar, sinjalizon interesin rus për rivendosjen e kontakteve ekonomike me Perëndimin, nëse terreni politik lejon.

Takimi në Alaskë, i cili do të jetë i pari mes liderëve rus dhe amerikan pas një pauze katërvjeçare, pritet të jetë kyç për drejtimin që do të marrin marrëdhëniet SHBA–Rusi në vitet e ardhshme.

Delegacioni i përzgjedhur nga Kremlini tregon se Moska po shkon në këtë takim e përgatitur për diskutime të thella dhe të gjera – nga fronti i luftës në Ukrainë, deri te tavolina e investimeve globale.

Top Channel