Vendosja e Gardës Kombëtare në Uashington, kryebashkiakja i del kundër Trumpit: Duhet të mbrojmë qytetin nga kjo përpjekje autoritare

Kryetarja Muriel Bowser kritikoi të martën mbrëma planin ambicioz të Trump për goditjen e krimit, ndërsa iu përgjigj pyetjeve të qytetarëve gjatë një takimi virtual.

Bowser u pyet se si grupet fetare mund të ndihmonin për të mbështetur komunitetin, kur ajo u bëri thirrje banorëve të mbronin qytetin.

Ajo u përgjigj: “Ky është një moment kur komuniteti duhet të angazhohet. Të mbrojmë qytetin tonë, autonominë tonë, të drejtën tonë për vetëqeverisje.

‘Ta ndalojmë këtë njeri dhe të sigurohemi që zgjedhim një Dhomë të Përfaqësuesve me shumicë demokrate që të kemi një mbrojtje ndaj kësaj përpjekje autoritare.’
Komentet e fundit të Bowser ishin dukshëm më të ashpra se qasja e saj më e kujdesshme më parë ndaj planeve të Trump. Të hënën, ajo e kishte përshkruar marrjen federale si “të paprecedentë” por kishte pranuar gjithashtu se nuk ishte “krejtësisht e befasuar”.

Trupa të Gardës Kombëtare me uniforma kamuflazhi filluan të mbërrinin në kryeqytet rreth orës 20:00 të martën, si pjesë e përpjekjes së Shtëpisë së Bardhë për të frenuar krimin e dhunshëm.
Automjete ushtarake Humvee u parkuan në National Mall të martën në mbrëmje me oficerë pranë tyre.
Oficerë të tjerë, që dukeshin nga një agjenci tjetër, u panë duke ndaluar e kontrolluar automjete, si dhe duke folur me banorët.

The New York Times raportoi se trupat qëndruan në zonë për rreth dy orë përpara se të largoheshin, pas asaj që një rreshter i lartë i quajti “patrullë prezence”.
Dokumente të Pentagonit, të siguruara nga The Washington Post, tregonin se Trump po shqyrtonte planet për një “Forcë Reagimi të Shpejtë për Çrregullime Civile në Vend”. Kjo forcë do të ishte e gatshme të vendoste 600 trupa brenda një ore kudo në SHBA, nëse do të merrte dritën jeshile.
Të hënën, presidenti la të kuptohej se ky veprim mund të zgjerohej edhe në qytete të tjera të mëdha, përfshirë Nju Jorkun dhe Çikagon.

“Kjo do të shkojë më tej,” tha presidenti. “Do ta marrim sërish kryeqytetin tonë… dhe pastaj do të shohim edhe qytete të tjera,” para se të përmendte Çikagon, Los Anxhelosin, Nju Jorkun, Baltimoren dhe Oakland-in. Drejtori i FBI-së, Kash Patel, tha në një postim në X se deri më tani 23 persona ishin arrestuar në qytet me ndihmën e partnerëve.

Sipas Patel, një person u arrestua me urdhër kërkimi për një akuzë të mëparshme vrasjeje, ndërsa të tjerët u kapën për posedim të paligjshëm armësh zjarri.
“Këto janë vetëm disa shembuj — sapo kemi filluar. Kur u jepet mundësia policëve të mirë të bëjnë punën e tyre, ata mund të pastrojnë rrugët tona shpejt,” shtoi ai.
Sekretarja e shtypit të Shtëpisë së Bardhë, Karoline Leavitt, tha se rreth 850 oficerë dhe agjentë kishin patrulluar në të gjithë qytetin të hënën dhe kishin kryer arrestime.
Lëvizja e Trump u njoftua të hënën, me presidentin që tha se ishte për të “shpëtuar kryeqytetin e kombit nga krimi, gjakderdhja, kaosi dhe mjerimi”.

I rrethuar nga anëtarët e kabinetit, Prokurorja e Përgjithshme Pam Bondi, Prokurorja e SHBA-së për DC Jeanine Pirro, Drejtori i FBI-së Kash Patel, Sekretari i Mbrojtjes Pete Hegseth dhe Drejtori i Brendshëm Doug Burgum, Trump tha se do t’u urdhëronte zyrtarëve federalë të rendit që të përdorin taktika agresive kundër shkelësve më të rrezikshëm të qytetit.

“Ju pështyni dhe ne godasim — dhe mund të godasim shumë fort,” tha ai.
Presidenti gjithashtu premtoi se do të pastrojë kampet e të pastrehëve nga parqet dhe tokat publike të Uashingtonit. Forcat federale të rendit filluan vendosjen e tyre në gjithë qytetin gjatë fundjavës, duke rritur menjëherë një shfaqje të dukshme force që u ndje nga banorët.
“Kryeqyteti ynë është pushtuar nga banda të dhunshme, kriminelë gjakatarë, turma të rinjsh të pakontrolluar, maniakë nën efektin e drogës dhe të pastrehë — dhe nuk do ta lejojmë më këtë,” tha ai. “Nuk do ta pranojmë.” Trump gjithashtu solli në vëmendje krime të fundit të tmerrshme në qytet, përfshirë një praktikant kongresi 21-vjeçar që u vra nga një plumb qorr gjatë një të shtënë nga makina në lëvizje.

Po ashtu, një ish-zyrtar të administratës së Trump që u vra gjatë një grabitjeje makinash dhe një kongresmen demokrat që u grabit nën kërcënimin e armës.
Trump përmendi edhe një “të çmendur” që theri një asistent të senatorit Rand Paul në vitin 2023 dhe një vajzë 3-vjeçare që u vra me armë pranë Kapitolit. Pretendimi i presidentit se krimi është rritur është kundërshtuar nga Bowser, e cila ka treguar statistika që sipas saj dëshmojnë se krimi i dhunshëm ka rënë në Distrikt që nga viti 2023.

Top Channel