Liverpool nuk ndalet në merkato edhe pas 300 milionë eurosh të shpenzuara, “The Reds” duan në skuadër edhe mbrojtësin e Anglisë

Sipas “The Times”, klubi nga Anfield është gati të bëjë një ofertë që mund të arrijë në total 35 milionë paund (rreth 40.5 milionë euro) për 25-vjeçarin.

Nëse marrëveshja finalizohet, Guéhi do të bëhej mbrojtësi qendror më i shtrenjtë i Liverpool-it që nga transferimi i Virgil Van Dijk nga Southampton për 84.6 milionë euro në janar 2018.

Guéhi ka qenë objekt interesimi edhe më parë. Verën e kaluar, Newcastle thuhet se bëri një ofertë që u refuzua nga Palace, ndërsa Tottenham tentoi ta transferonte në janar. Megjithatë, me kontratën e tij që skadon verën e ardhshme, Crystal Palace është nën presion për ta shitur këtë afat kalimtar dhe Liverpool duket se ka fituar garën.

Pas transferimit nga Chelsea te Palace në verën e vitit 2021 për 23.3 milionë euro, Guéhi është shndërruar në një nga mbrojtësit më të vlerësuar në Premier League.

Vlera e tij në treg është rritur nga 10 milionë euro në 45 milionë euro në katër vite, duke u bërë lojtari i dytë më i vlefshëm në klubin londinez dhe i 18-ti më i vlefshëm mes anglezëve.

Vetëm shtatë mbrojtës qendrorë në Premier League kanë shënuar rritje më të madhe në këtë periudhë.

Nëse ky transferim realizohet, shpenzimet e Liverpool-it në këtë merkato verore do të arrijnë në 334.2 milionë euro – shifra më e lartë e klubit në një dritare të vetme transferimesh dhe e katërta më e madhe në historinë e futbollit. Më shumë para në një merkato kanë shpenzuar vetëm Paris Saint-Germain (350 milionë euro në verën e 2023), Al-Hilal (353 milionë euro në verën e 2023) dhe Chelsea (464 milionë euro në verën e 2023).

Top Channel