“Forca kapiten Baresi, fitoje edhe këtë betejë”, bota e futbollit mesazhe prekëse për legjendën e Milanit pas operacionit në mushkëri: Na mësove të mos dorëzohemi

Lajmi ka bërë që e gjithë bota kuqezi dhe jo vetëm të bashkohet për t’i dhënë mbështetje me dashuri.

Pas operacionit vetë Baresi ka reaguar duke thënë se i do i duhet pak kohë për t’u rikuperuar.

“Do të më duhet kohë për t’u rikuperuar. Tifozë të dashur, dua t’ju komunikoj se do të më duhet pak kohë për t’u rikuperuar. Faleminderit Milanit dhe të gjithëve ju për mbështetjen dhe përkrahjen. Me dashuri, një përqafim”, janë fjalët e Franco Baresit, i cili mban postin e nënkryetarit të nderit që prej vitit 2020.

Reagimet

Jannik Sinner, numri 1 në botë dhe tifoz i madh i Milanit, nuk e kurseu mbështetjen për Franco Baresin: “Forca super kapiteni ynë, të gjithë po bëjmë tifo për ty”.

Roberto Donadoni, shok skuadre te Milani dhe Italia: “Përshëndetje Franco, thjesht si mik dua të jap në çdo mënyrë një ndihmë të vogël në këtë moment të vështirë. Për ty do jem gjithmonë aty, kapiten”.

Frank Rijkaard, shok skuadre te Milani: “Shpresoj që Franco të shërohet sa më shpejt. Karakteri i tij ka qenë gjithmonë ai i një luftëtari dhe jam i bindur që do fitojë edhe këtë betejë. I dërgoj shumë dashuri dhe forcë”.

Adriano Galliani, drejtues i Milanit të tij: “Baresi është një person i fortë, i vetmi që kam parë të luajë me krahun e thyer dhe të rikuperojë pas një operacioni në menisk në kohë për të luajtur një finale Bote, kur të gjithë, madje edhe mjeku ynë, ishin të bindur që do kthehej në shtëpi. Fizikisht dhe moralisht është shumë i fortë dhe do ta kalojë edhe këtë. Çfarë dua t’i them? Franco 6 për gjithmonë. Nuk është sekret që për të kam një dashuri të veçantë. Kur me Berlusconin shkuam te Milani, në 1986, patëm fatin ta gjenim atje. Ishte më i dashuri për presidentin, i vetmi me të cilin ai firmoste kontratat vetë dhe më pas më tregonte çmimin. Në fushë ishte… VAR-i para VAR-it. Kur ngre dorën, ishte gjithmonë pozicion jashtë loje dhe nuk gabonte kurrë. Kapiteni ynë është i jashtëzakonshëm”.

Demetrio Albertini, shok skuadre te Milani dhe Italia: “Përshëndetje Franco, Kapiten i vërtetë (me “K” të madhe siç e meriton), na ke mësuar të mos dorëzohemi kurrë me kokën lart, me dinjitet dhe në heshtje. Tani jemi ne pranë teje, gati të të kthejmë pak nga ajo forcë që ti gjithmonë na ke dhënë. Jemi me ty dhe mezi presim të të përqafojmë”.

Arrigo Sacchi, trajneri i tij te Milani dhe Italia: “Dua t’i dërgoj një përqafim të fortë kapitenit tim në këtë moment delikat. Franco për mua ka qenë dhe është një person shumë i rëndësishëm që e dua shumë. Jam i sigurt që edhe në këtë situatë do tregojë kurajë dhe forcë vullneti”.

Francesco Graziani, shok skuadre me Italinë në 1982: “Ke qenë një kapiten i guximshëm, që nuk je rrëzuar kurrë përballë vështirësive më ekstreme. Ke luftuar dhe fituar shumë beteja dhe jam i sigurt që do fitosh edhe këtë. Së bashku kemi kaluar momente shumë të bukura dhe tani jemi të gjithë pranë teje: do të ndihmojmë të përballosh këtë fazë të jetës tënde”.

Fabio Capello, ish-trajneri i Milanit: “I dashur Franco, leximi i lajmit për operacionin tënd më ka tronditur shumë. Mendja m’u kthye tek hera e parë që jemi njohur te Milani, ti një talent i ri 17-vjeçar, unë veteran në fund të karrierës. Që atëherë lindi një miqësi që vazhdon edhe sot, edhe pse atëherë nuk e imagjinoja që rrugët tona do të kryqëzoheshin sërish me mua në pankinë dhe ty si komandant në fushë, me shiritin në krah. Gjithmonë elegant, serioz, i fortë. Sa shumë kemi kaluar, fitore të jashtëzakonshme dhe humbje të dhimbshme. Për fat më shumë fitore sesa humbje. Thuhet që në vështirësitë e jetës një njeri zbulon forcën e tij. Ti e kishe këtë forcë edhe para kësaj beteje të fundit. Dhe nëse ka dikush që di si të luftojë, i pari që më vjen në mendje je ti. Jemi të gjithë me ty, Kapiten!”

Roberto Mancini, shok skuadre me Italinë: “Hajde Franco, gjithmonë ke qenë një shkëmb dhe as kjo nuk do të të shembë. Të dërgoj një përqafim shumë të madh”.

Filippo Galli, shok skuadre te Milani: “Përshëndetje Franco, përshëndetje Kapiten, na ke marrë për dore deri në të pamundurën, sepse me ty në fushë asgjë nuk ishte e pamundur. Tani jemi të gjithë pranë teje në këtë betejë të re, të bindur që i fortë siç je do dalësh edhe një herë fitimtar. Të duam shumë!”

Giuseppe Bergomi, shok skuadre me Italinë: “Francos i uroj më të mirën sepse e njoh prej një jete, që kur luaja me vëllain e tij Beppe. Kam humbur llogarinë e herëve që jemi përballur në derbi dhe ai ishte një kundërshtar nga ata vërtet të fortë. Edhe në momentet më të vështira të një ndeshjeje i mjaftonin dy fjalë për të vënë në rregull ekipin. Në fushë ka treguar gjithmonë guxim, forcë dhe dëshirë për të luftuar. Të njëjtat cilësi do t’i tregojë edhe tani dhe do ta fitojë edhe këtë betejë. Jemi të gjithë pranë tij dhe bëjmë tifo për të. Me Francon kemi qenë shokë në Kombëtare dhe gjatë viteve nuk jemi humbur kurrë nga sytë. Jemi miq dhe unë si të gjithë e dua shumë, jo vetëm për lojtarin që ka qenë, por sidomos për njeriun që është jashtë fushe”.

Top Channel