Një 48-vjeçare nga Tropoja rezulton e zhdukur prej më shumë se një jave, por sot Gjykata e Kukësit vendosi të lërë pas hekurave bashkëshortin e saj.
Familjarët e Nadire Shpatës, denoncuan më 22 korrik se 48-vjecarja ishte larguar nga banesa për shkak të dhunës së ushtruar nga bashkëshortit.
Që nga ajo kohë policia e Tropojës po zhvillon kërkime për gruan, madje edhe përtej kufirit, në Gjakovë të Kosovës. Nga hetimet rezultoi se në automjetin e bashkëshortit të saj, Imer Shpata, me profesionin agronom është gjetur celulari i gruas.
Imer Shpata mohon të ketë informacion mbi vendndodhjen e saj e aq më tepër të jetë autori i ndonjë krimi të mundshëm. Në kushtet kur dyshimet janë të forta, gjykata e Kukësit vendosi të lërë në burg 58 vjeçarin deri në gjetjen e bashkëshortes së tij.
Çifti, prindër të tre fëmijëve rezulton të kenë pasur probleme të vazhdueshme në familje, madje në vitin 2023 Imeri ishte dënuar për dhunë në familje.
Top Channel
