Një 31-vjeçar është ndëshkuar me masë administrative dhe është proceduar për shkak e ka thyer rregullat e reja të Kodit Rrugor.
Ditën e djeshme i riu parkoi automjetin në mënyrë të parregullt mbi trotuar, duke penguar kështu qarkullimin e mjeteve dhe lëvizjen e këmbësorëve në qytetin e Sarandës.
Sipas uniformave blu, 31-vjeçari u gjobit me vlerën 20 mijë lekë.
Njoftimi i policisë:
Parkoi automjetin në mënyrë të parregullt, mbi trotuar, duke penguar qarkullimin e mjeteve dhe lëvizjen e këmbësorëve, në një nga rrugët e qytetit të Sarandës, procedohet penalisht dhe gjobitet me masë administrative 20 000 lekë, 31-vjeçari.
Strukturat e Komisariatit të Policisë Sarandë, në vijim të kontrolleve për evidentimin dhe ndëshkimin e rasteve të parkimeve të parregullta që pengojnë qarkullimin normal të mjeteve dhe qytetarëve, konstatuan më datë 26.07.2025, rreth orës 23:30, në rrugën “Vangjel Pandi”, një automjet të parkuar në mënyrë të parregullt, mbi trotuar, duke bllokuar rrugëkalimin për automjete të tjera dhe për këmbësorët.
Menjëherë pas identifikimit të drejtuesit të automjetit, shtetasit E. D., 31 vjeç, banues në Kamëz, specialistët për Hetimin e Krimeve në Komisariatin e Policisë Sarandë referuan materialet në Prokurori dhe nisën procedimin penal ndaj tij, për veprën penale “Pengimi i qarkullimit të mjeteve të transportit”, parashikuar nga neni 293 i Kodit Penal.
Gjithashtu, nga shërbimet e Qarkullimit Rrugor Sarandë, ndaj drejtuesit të automjetit tip “Benz”, u vendos edhe masë administrative në vlerën 20 000 lekë, për shkelje të nenit 159, pika 2/4, të Kodit Rrugor.
Drejtoria Vendore e Policisë Vlorë apelon ndaj drejtuesve të mjeteve që të respektojnë rregullat e qarkullimit rrugor dhe të shmangin çdo veprim që pengon lëvizjen e lirë të mjeteve dhe këmbësorëve. Parkimet e gabuara, veçanërisht në trotuare apo rrugëkalime, do të përballen me masa të menjëhershme penale dhe administrative.
Policia fton qytetarët të denoncojnë çdo shkelje në numrin 112, duke garantuar reagim të menjëhershëm dhe konform ligjit.
Top Channel
