Ministri i Jashtëm Italian: Ne do ta njohim shtetin e Palestinës nëse ajo njeh Izraelin 25/07 19:16
Një tjetër dramë njerëzore po trondit familjet e viktimave të aksidentit ajror të Air India, ku më 12 qershor një Boeing 787 Dreamliner u rrëzua gjatë ngritjes nga aeroporti i Ahmedabadit në Indi, duke shkaktuar vdekjen e 241 pasagjerëve, përfshirë 52 shtetas britanikë.
Tani, të paktën dy familje britanike kanë marrë trupa që nuk u përkasin të afërmve të tyre, ka denoncuar avokati James Healy-Pratt, i cili përfaqëson 20 familje angleze që humbën të dashurit e tyre në tragjedi.
Sipas tij, autoritetet indiane kanë bërë gabime serioze në identifikimin e viktimave, që janë zbuluar më vonë nga një hetim mjekoligjor i kryer në Mbretërinë e Bashkuar përmes analizës së ADN-së.
“Kjo nuk është vetëm një çështje teknike, por një dhimbje e re për familje që janë tashmë të shkatërruara emocionalisht,” tha Healy-Pratt.
Raportimet e para erdhën nga gazeta Daily Mail, që dokumentoi raste ku trupat e sjellë në Mbretërinë e Bashkuar rezultuan të ishin të pasagjerëve të tjerë.
Në një rast, autoritetet informuan familjen vetëm pak para funeralit se trupi në arkivol nuk përkiste viktimës që ata prisnin të përcillnin.
Në një tjetër rast, një arkivol përmbante mbetje të dy personave të ndryshëm, duke tronditur thellësisht të afërmit që prisnin të kishin një moment paqeje dhe nderimi për të dashurit e tyre.
Qeveria indiane ka reaguar përmes zëdhënësit të Ministrisë së Jashtme, Randhir Jaiswal, duke deklaruar se është në bashkëpunim me palën britanike për të zgjidhur situatën: “Po punojmë me Mbretërinë e Bashkuar për të zgjidhur problemin”.
Në të njëjtën kohë, Londër zyrtare ka bërë të ditur se procesi i identifikimit është nën juridiksionin e autoriteteve indiane, duke theksuar kompleksitetin ekstrem të ngjarjes për shkak të natyrës shkatërrimtare të aksidentit, që la të gjallë vetëm një pasagjer dhe shkaktoi mbi 260 viktima në total.
Avokati Healy-Pratt ka njoftuar se kjo çështje do të jetë në rendin e diskutimeve midis kryeministrit britanik Keir Starmer dhe homologut të tij indian Narendra Modi, i cili ndodhet për vizitë në Mbretërinë e Bashkuar për të nënshkruar marrëveshjen e re të tregtisë së lirë mes dy vendeve.
Ky zhvillim i fundit hedh dritë të re mbi mënyrën se si trajtohen pasojat e një fatkeqësie ajrore të kësaj përmase dhe ngre pyetje të forta për kompetencën dhe transparencën e autoriteteve përgjegjëse, duke lënë qindra familje jo vetëm në zi, por edhe në pasiguri të plotë mbi fatin dhe respektin e fundit të të afërmve të tyre.
Top Channel
