Kush është agjencia famëkeqe ruse që fshihet pas sulmeve kibernetike, helmimeve dhe sabotimeve në Europë

Dy oficerë të lartë shënjestruan vajzën e Sergei Skripal, Yulia, sipas Ministrisë së Jashtme, duke infektuar telefonin e saj me një program keqdashës të njohur si X-agent, i cili i mundësoi hakerëve të gjurmonin atë dhe anëtarët të familjes së saj.

Dyshja e përsosën ekspertizën e tyre me programin keqdashës, sipas Ministrisë së Jashtme, duke e përdorur atë me efekt shkatërrues në zgjedhjet presidenciale të SHBA-së të vitit 2016 kur hakuan Komitetin Kombëtar Demokrat për të përhapur dezinformata dhe për të destabilizuar fushatën.

Oficerë të tjerë në njësinë 26165, kolektivi famëkeq i njohur edhe si Fancy Bear, nisën një fushatë kaosi gjatë viteve. Nga zbulimi për sulmet ajrore që vranë civilë në Ukrainë deri te hakerimi i Lojërave Olimpike dhe sulmet ndaj infrastrukturës europiane, gjurmët e tyre të gishtërinjve ishin kudo.

Aktivitetet e saj u detajuan nga qeveria britanike të premten, ndërsa vendosi një shkallë të paparë sanksionesh ndaj saj dhe dy njësive të tjera kibernetike të GRU-së (Inteligjenca ruse) . Sanksionimi, duke përfshirë 18 oficerë të inteligjencës ushtarake të emëruar, jep pasqyrën më të qartë deri më tani mbi përpjekjet e Rusisë për të destabilizuar dhe fushatën e saj të sulmeve kibernetike, sabotimit dhe sulmeve të tjera.

Njësia 26165

Në krye të listës së sanksioneve. Një kolektiv hakerash elitarë, njësia ka kryer operacione mbledhjeje inteligjence dhe sulmesh kibernetike dhe rrjedhjeje informacioni kundër Ukrainës, partnerëve evropianë, aleatëve të NATO-s dhe Mbretërisë së Bashkuar.

Duke vendosur sanksione, Ministria e Jashtme theksoi shënjestrimin e Skripal në vitin 2013, që thuhet se është organizuar nga Ivan Yermakov dhe Aleksey Lukashev, oficerë të lartë në njësi.

Yulia Skripal dhe babai i saj, një ish-agjent i dyfishtë që u vendos në Salisbury, ishin nën mbikëqyrje për vite me radhë para se të sulmoheshin me agjentin nervor novichok, ku pothuajse humbën jetën.

Yermakov dhe Lukashev, që besohet se janë në Moskë, janë në një listë të kërkuar nga FBI për rolet e tyre të dyshuara në përdorimin e programeve keqdashëse për të ndërhyrë në zgjedhjet presidenciale.

Ministria e Jashtme akuzoi oficerët e 26165 për kryerjen e zbulimit online për të ndihmuar në shënjestrimin e sulmeve me raketa kundër Mariupol. Përfshiu sulmin që shkatërroi teatrin e qytetit në mars të vitit 2022, kur u vranë qindra civilë.

Operacione të tjera përfshijnë përpjekje sabotimi ndaj transmetuesve europianë, sulmin e vitit 2015 ndaj Bundestagut, në të cilin u vodhën të dhëna dhe u shënjestrua emaili i kancelares Angela Merkel, përpjekje për phishing ndaj laboratorëve që hetonin sulmet në Salisbury dhe sulme kibernetike vitin e kaluar ndaj subjekteve të përfshira në Lojërat Olimpike dhe Paralimpike në Paris.

Njësia 29155

Gjithashtu e sanksionuar, njësia 29155 është më e njohur për kryerjen e sulmeve me agjentë nervorë dhe është akuzuar nga Qendra Kombëtare e Sigurisë Kibernetike, për një “fushatë aktiviteti kibernetik keqdashës që synon qeverinë dhe organizatat e infrastrukturës kritike në të gjithë botën”.

U fajësua në vjeshtë për përdorimin e malware të njohur si “WhisperGate” për të synuar dhe kompromentuar sistemet kompjuterike, duke përfshirë rrjetet qeveritare ukrainase që ishin të lidhura me infrastrukturën kritike. Qëllimi i saj që nga viti 2022 ka qenë të prishë përpjekjet për të ofruar ndihmë atje.

Agjentët e saj akuzohen gjithashtu për përfshirje në dy shpërthime në depot e municioneve në Republikën Çeke që vranë dy punëtorë në vitin 2014.

Operativët e 29155 besohet se qëndrojnë pas tentativës së vrasjes në prill 2015 të një tregtari bullgar armësh, dhe kjo është lidhur me sindromën Havana, simptomat misterioze që përfshijnë lëndime në tru të përjetuara nga diplomatët amerikanë vitet e fundit.

Një nga operativët e saj me përvojë është Artem Valeryvich Ochichenko, i akuzuar për shënjestrimin e infrastrukturës në Ukrainë dhe organizatave politike në Francë.

Njësia 74455

Thuhet të jetë një aktor kibernetik shumë i sofistikuar, i specializuar në operacione kibernetike shkatërruese. Ministria e Jashtme thotë se njësia 74455 synon infrastrukturën kritike kombëtare, sistemet e kontrollit industrial dhe objektivat ukrainase.

Midis viteve 2015 dhe 2017, ajo kreu një seri sulmesh kibernetike për të çaktivizuar rrjetin elektrik të Ukrainës dhe për të synuar infrastrukturën kyçe. Në vitet e fundit, ajo ka ndërprerë kanalet e telekomunikacionit nga ofruesi më i madh i Ukrainës, që ka 24 milionë klientë, dhe gjithashtu ka tentuar sulme kibernetike ndaj hetimeve zyrtare për helmimet me novichok.

Një rrjet më i gjerë

Iniciativa Afrikane, e cila zhvillon fushata dezinformimi në kontinent, duke përfshirë përpjekjen për të minuar programet e shëndetit publik dhe drejton ferma trollësh (persona që sulmojnë përdoruesit në rrjetet sociale) të financuara nga Rusia, u sanksionua gjithashtu.

Artyom Sergeevich Kureyev, kryeredaktor i iniciativës, është sanksionuar dhe është lidhur me një rol të mëparshëm në FSB të Rusisë, sipas Ministrisë së Jashtme.

Zyrtarët britanikë theksuan se këto njësi ishin pjesë e një makinerie më të gjerë ruse të angazhuar në sulme kibernetike, dezinformim dhe manipulim informacioni, ndërhyrje fizike dhe sabotim.

Burimet kanë treguar se GRU qëndron pas shënjestrimit të DHL, pjesë e zinxhirit të furnizimit për përpjekjet e luftës në Ukrainë, me një pajisje ndezëse në Birmingham. Pesë burra u dënuan së fundmi për përfshirjen e tyre në një sulm zjarrvënës të urdhëruar nga Rusia në një depo në Londrën lindore plot me furnizime të destinuara për Ukrainën.

“Spiunët e GRU po zhvillojnë një fushatë për të destabilizuar Evropën, për të minuar sovranitetin e Ukrainës dhe për të kërcënuar sigurinë e qytetarëve britanikë. Kremlini nuk duhet të ketë asnjë dyshim: Ne e shohim atë që po përpiqen të bëjnë në hije dhe nuk do ta tolerojmë”, tha Ministri i Jashtëm britanik, David Lammy.

Top Channel