Lufta dhe paqja me Kinën, Trump “zbut” marrëdhëniet me Xi Jinping: Vulos marrëveshje tregtare!
28/06 12:06
Mijëra njerëz mbushën rrugët kryesore të Teheranit, gjatë funeralit masiv të organizuar për 60 viktimat e sulmeve izraelite, përfshirë disa prej figurave më të larta ushtarake dhe shkencore të vendit.
Ceremonia u zhvillua pas përfundimit të një armëpushimi 12-ditor mes Iranit dhe Izraelit, që pasoi përshkallëzimin më të rëndë të dhunës në vitet e fundit mes dy vendeve.
Në mesin e viktimave që u përcollën për në banesën e fundit ishin shefi i Gardës Revolucionare, gjenerali Hossein Salami, dhe kreu i programit të raketave balistike të Gardës, gjenerali Amir Ali Hajizadeh.
Arkivolet e tyre, së bashku me ato të viktimave të tjera – përfshirë shkencëtarë bërthamorë, katër gra dhe katër fëmijë – u transportuan me kamionë ceremonialë përgjatë bulevardit Azadi në zemër të kryeqytetit.
Televizioni shtetëror iranian raportoi se ceremonia përfaqësonte funeralet e para publike për komandantët e lartë që nga shpallja e armëpushimit. Autoritetet ndërmorën masa të veçanta, duke mbyllur institucionet shtetërore për të lejuar nëpunësit civilë të marrin pjesë në homazhe.
Pamjet e drejtpërdrejta nga mediat iraniane treguan turmat duke mbajtur flamuj të zinj dhe portrete të udhëheqësve të vrarë, ndërsa thirrjet për “hakmarrje” kundër Izraelit u dëgjuan shpesh gjatë ceremonisë.
Ngjarja shënon një moment të rëndësishëm simbolik për regjimin iranian, i cili e ka përshkruar vdekjen e komandantëve si “dëshmorë për kombin” dhe një humbje të madhe për strukturat ushtarake dhe strategjike të Republikës Islamike.
Top Channel
