Tentuan të korruptojnë policinë për të shmangur ndëshkimin, në pranga dy shtetas 15/09 11:27
Në një nga zonat më prodhuese në vend, në Frakull fermerët po përballen me një nga krizat më të rënda të viteve të fundit.
Në kulmin e sezonit të frutave dhe perimeve, mungesa e fuqisë punëtore po paralizon punën në fusha.
Ndërsa luleshtrydhja është drejt fundit dhe prodhimi i shalqirit e domates sapo ka nisur, fermerët thonë se nuk kanë më fuqi të përballojnë vëllimin e madh të punëve pa ndihmë.
Shumë nga prodhimet rrezikojnë të mbeten të pavjela, duke sjellë humbje të mëdha ekonomike.
“Kam 2 hektarë me shalqinj, 5 dynym domate fushe dhe 5 dynym luleshtrydhe. Nuk po gjejmë dot punëtorë. Po punojmë me forcat tona familjare. Vjet, ngarkimi i shalqirit kushtonte 20 mijë lekë për ton, këtë vit ka shkuar 25-30 mijë. Janë rritur edhe kostot për transportin nga toka në pikën e grumbullimit. Po na ngelet prodhimi në fushë. Luleshtrydhen po e shesim për recel sepse nuk ka kush ta mbledhë për treg”, deklaroi Miri Zeqaj-kultivues.
Në të njëjtën situatë ndodhet edhe Nesti Troka, prodhues dhe grumbullues frutash dhe perimesh.
“Fushata sapo ka nisur me shalqirin, domaten, nektarinën. Luleshtrydhja është drejt fundit. Problemi kryesor është krahu i punës. Po reduktojmë sipërfaqet e mbjella, sepse nuk ka kush të vijë t’i vjelë. Këtu një punëtor paguhet 10 euro ora, më shumë se në Greqi, por prapë nuk gjejmë njerëz”, u shpreh Nesti Troka-kultivues.
Edhe pse fermerët kanë rritur pagesat dhe ofrojnë kushte më të mira sesa në disa vende fqinje, mungesa e punonjësve mbetet një sfidë serioze që rrezikon jo vetëm të ardhurat e tyre, por edhe furnizimin e tregut vendas.
Top Channel
