Telashe për Von der Leyen, aleatët kërcënojnë se do tërheqin mbështetjen për presidentin e Komisionit Europian 21/06 11:42
Mahmoud Khalil, një aktivist palestinez dhe banor i përhershëm ligjor në SHBA, është liruar nga një qendër paraburgimi në Louisiana pas më shumë se tre muajsh ndalim nga autoritetet e imigracionit.
Khalil u arrestua në mars përpara apartamentit të tij në kampusin e Universitetit Columbia në New York, ku ishte i njohur për rolin e tij në mbështetje të protestave studentore pro-palestineze.
Duke dalë nga qendra e paraburgimit me një buzëqeshje dhe i mbështjellë me një shami tradicionale arabe, simbol i identitetit dhe rezistencës palestineze, Khalil tha se ishte i lumtur të rikthehej te familja e tij dhe veçanërisht të përqafonte për herë të parë djalin e tij të porsalindur.
Gjykatësi federal Michael Farbiarz urdhëroi lirimin me kusht të Khalil-it, duke deklaruar se ai “nuk përbën rrezik për shoqërinë dhe nuk ka rrezik arratisjeje”. Farbiarz theksoi se ndalimi i tij përtej kësaj kohe ishte i pajustifikueshëm dhe i motivuar politikisht. Ai vuri në dukje se rasti i Khalil përbënte një shembull të “rrethanave të jashtëzakonshme”, përfshirë përpjekjet për ta ndëshkuar atë për bindjet e tij politike pro-palestineze.
Khalil ishte një nga arrestimet e para që synonin aktivistët studentorë gjatë administratës Trump, e cila më herët kishte deklaruar se ndalimi i tij ishte për të dërguar një “mesazh” kundër protestuesve. Edhe pse nuk është akuzuar për ndonjë krim, qeveria kishte kërkuar deportimin e tij, duke pretenduar se pranisë së tij në SHBA i mungonte interesi kombëtar, një pretendim që gjykatësi e rrëzoi si të pabazuar.
Avokatët e Khalil kanë paralajmëruar se do të apelojnë vendimin e një gjykatësi imigracioni që më herët kishte konfirmuar mundësinë e dëbimit të tij. Ndërkohë, ata theksojnë se lirimi i tij do t’i mundësojë të vazhdojnë betejën ligjore në kushte më të favorshme dhe jashtë qelive të izolimit.
Top Channel
