Intervista e Plotë/ Nis epoka e Gattusos: Një ëndërr e bërë realitet, rikthimi i Italisë në Kupën e Botës është thelbësor

Në Coverciano ka nisur aventura e re e Gennaro Gattusos si trajner i Kombëtares Italiane, i cili zëvendëson Luciano Spallettin e shkarkuar dhe merr drejtimin gjatë rrugës së kualifikimeve për Botërorin 2026, tashmë shumë i ndërlikuar pas humbjes 3-0 në Norvegji.

“Është një ëndërr që bëhet realitet dhe shpresoj të jem në lartësinë e duhur,” – tha trajneri i ri në konferencën për shtyp të prezantimit. “Objektivi është të rikthejmë Italinë në Kupën e Botës, sepse është thelbësore për futbollin dhe kombin tonë.” “Unë nuk jam vetëm zemër dhe grintë siç isha si lojtar; si trajner kam ide të qarta për llojin e futbollit që dua të luaj,” – shtoi ai. “Sot, një lojtar i padisiplinuar taktikisht si unë dikur, nuk do ta aktivizoja në fushë.”

Konferenca e Gattusos

Pas hyrjes së presidentit Gravina, mori fjalën Gattuso: “Është një ëndërr që bëhet realitet dhe shpresoj të jem në lartësinë e detyrës. E di që nuk është e lehtë, por asgjë në jetë nuk është e lehtë. Unë dhe stafi im e dimë që kemi shumë punë përpara, por kemi dhe ndërgjegjësimin që mund të bëjmë një punë të mirë. Ka më pak për të folur dhe më shumë për të punuar. Mendoj se kemi lojtarët, vetëm duhet t’i vendosim në kushtet më të mira për të dhënë maksimumin.”

Çfarë i nevojitet Kombëtares?

“Entuziazëm, dëshirë për të qenë bashkë dhe të bashkuar. Këto ditë kam një ide shumë të qartë për atë që duhet bërë. Duhet të rikthejmë entuziazmin dhe të mos mendojmë negativisht. Duhet të krijojmë një familje. Tani, nuk janë të rëndësishëm skemat apo taktikat, por grupi dhe mentaliteti që për shumë vite na ka dalluar në botë.”

Besim apo shpresë për të çuar Italinë në Botëror?

“Besim. Kemi lojtarë të rëndësishëm. Kemi futbollistë që janë ndër dhjetë më të mirët në botë në rolin e tyre. Kemi një skuadër të fortë. Por nuk duhet të mendojmë për individë. Skuadra ka vlera dhe jam i bindur që mund ta arrijmë objektivin. Kur më telefonuan Gravina dhe Buffon, nuk hezitova asnjë sekondë. Ka shumë punë, por kemi cilësinë për të shkuar në Botëror.”

Identiteti italian

“Ka një fakt që duhet të na bëjë të reflektojmë: këtë vit në kampionatin italian kanë luajtur 68% të huaj dhe vetëm 32% italianë. Në nivel të rinjsh është bërë një punë e madhe, por pas moshës U19 lojtarët humbasin rrugës. Te Hajduk Split aktivizova lojtarë të lindur në 2005, 2006 dhe 2007. Duhet t’u japim më shumë hapësirë të rinjve. Të veshësh fanellën e Kombëtares dhe të jesh jashtë Botërorit dy herë nuk është e thjeshtë, por nuk duhet të kemi frikë.”

Për tifozin La Russa

“Nuk dua të bëj polemika. Shpresoj t’i ndryshoj mendje dhe të arrijmë objektivin që kemi të gjithë.”

Është ende ai Gattuso i dikurshëm?

“Figura si lojtar është e vështirë të fshihet. Të gjithë më shohin si zemër dhe grintë, por sot e shoh futbollin ndryshe nga sa e shihja si lojtar. Një Gattuso që bënte rrëmujë taktike nuk do ta aktivizoja në fushë sot. Vetëm me grintë nuk qëndron 11 vjet në pankinë. Më pëlqen të përditësohem dhe të flas për futboll. Futbolli ka ndryshuar dhe duhet të hysh në mendjen e lojtarëve. Nuk janë të gjithë njësoj. Sot janë më profesionistë, por kanë më shumë vështirësi për të bërë grup.”

Për skeptikët dhe bashkëpunëtorët

“Kam Bonuccin në staf dhe pesë të tjerë që punojnë me mua prej vitesh. Prandelli, Zambrotta dhe Perrotta do ndihmojnë me të rinjtë bashkë me Viscidi. Është nder për mua të punoj me ta. Sa i përket rezultateve, me Napolin dhe Milanin nuk arrita në Champions vetëm për një pikë. Këtë vit luftova për titull me Hajdukun. Varet si i tregojnë gjërat. Vetëm një skuadër fiton çdo sezon. Duhet parë nëse ke bërë ekipin të rritet dhe të rinjtë të përparojnë. Kam bërë diçka të mirë në këto vite.”

Roli i trajnerit

“Futbolli është jeta ime. Do jetë një punë ndryshe, me përditshmëri ndryshe. Shpresoj të mos streso shumë trajnerët e Serie A dhe ata jashtë vendit. Dua të udhëtoj, të flas me lojtarë, të shikoj ndeshje. Do marr trena dhe avionë për të bërë zgjedhjet më të mira.”

Frymëzimi nga Lippi

“Nuk mund të tregoj çfarë kam folur me Lippin… por shpresoj të bëj atë që bëri ai. Jo të fitoj Botërorin, por të rikrijoj atë atmosferë në dhomat e zhveshjes. Duhet të rikthejmë ndjenjën e përkatësisë. Dua t’i shoh lojtarët të vijnë në Coverciano me buzëqeshje.”

Lidhja me Kombëtaren

“Është problem gjeneratash, jo vetëm i futbollit tonë. Kur themi se të rinjtë kanë ndryshuar, jemi ne që duhet të përmirësojmë mënyrën si ndërveprojmë me ta. Duhet të hyjmë në mendjen e tyre në mënyrën e duhur. Nuk janë ata që duhet të ndryshojnë për ne, por ne për ta.”

Mesazhet e mbështetjes

“Më kanë prekur shumë mesazhe. Por momenti më i veçantë ishte kur prindërit e mi u emocionuan nga kjo mundësi që më dha Federata.”

Për skemat dhe zgjedhjet teknike

“Sot në kampionat 60% e skuadrave luajnë me katër mbrojtës dhe 40% me tre. Nuk është çështje skemash, por të vendosësh lojtarët në vendin e duhur. Jemi me -1 në golaverazh dhe Norvegjia me +11. Na duhet një skuadër që qëndron në gjysmën fushës së kundërshtarit dhe që dëmton kundërshtarin.”

Për ata që refuzojnë Kombëtaren

“Duhet kuptuar pse dikush refuzon Kombëtaren. E para që i kërkova Gravinas dhe Buffon ishte të më ndihmojnë për të sjellë dhe mbajtur lojtarët në Coverciano. Edhe klubet duhet të na ndihmojnë. Duhet të jemi të besueshëm. Kush thirret, qëndron në Coverciano, si në kohën time. Nëse nuk shërohet dot, kthehet në klub. E rëndësishme është të qëndrojmë bashkë. Dhimbjet gjithmonë ekzistojnë. Nëse do dëgjoja trupin tim, do kisha luajtur 50 ndeshje më pak. Duhet të shtrëngosh dhëmbët dhe të mos krijosh precedentë.”

Fjalët e para për lojtarët

“Do t’u them se duhet të jemi një familje dhe t’i themi gjërat në sy. Vështirësitë janë gjithmonë. Duhet ndihma e të gjithëve. 90 minuta janë të gjata. Duhet të themi gjëra që ndonjëherë nuk duam t’i dëgjojmë. Vetëm kështu rritemi.”

Lojtarë të rinj

“Do shohim çfarë thotë kampionati. Kam kontaktuar 35 lojtarë. Më bënë një pyetje për Chiesa… është ndër ata që mund të ndihmojë. Por fushën duhet ta tregojë vetë. Kur dikush luan mirë, dyert e Kombëtares janë të hapura. I kam thënë Chiesas që duhet të gjejë një skuadër ku të luajë rregullisht.”

Presioni dhe ndeshja me Norvegjinë

“Presionin e jep fanella e kaltër. Të jesh jashtë Botërorit është barrë për të gjithë. Duhet të reagojmë. Ndeshjen me Norvegjinë e kam parë. Ishte e vështirë. Ata ishin fizikisht shumë më të fortë. Disa lojtarë tanët vinin pas humbjes së rëndë në Champions. Nuk kishim fuqinë që kishte Norvegjia.”

Çfarë ruan nga Italia e Spallettit?

“Kam folur me Lucianon dhe kam një respekt të madh për të. Është një mjeshtër dhe ka vite që punon në futboll. Ka ide të reja dhe profesionalizëm të jashtëzakonshëm. Tani duhet të vendosim çfarë duam të bëjmë. Nuk ka shumë kohë për ndryshime. Duhet të kuptojmë rrugën që do ndjekim në 90 minuta.”

Për çfarë do jetë i ashpër?

“Lojtarët duhet të stërviten me intensitet maksimal. Disa prej tyre i kam trajnuar dhe e dinë. Në stërvitje duhet përkushtim dhe seriozitet. Jashtë fushe mund të bëjnë ç’të duan, por kur stërviten duhet të japin maksimumin.”

Mesazh për Kalabrian

“Nuk jam këtu për të dhënë mësime jete. Kalabria është tokë e jashtëzakonshme dhe fëmijëria ime ishte e mrekullueshme. Kur dëgjoja himnin, dëgjoja zërin e nënës që më thërriste. Të rinjtë duhet të ndjekin rrugën e dijes dhe të jenë njerëz të ndershëm.”

“Nuk kam pasur kohë për emocione. Kam shumë përgjegjësi dhe stres, por edhe shumë dëshirë për ta bërë mirë. E di që do jetë e vështirë, por Zoti do më japë forcën.”

Duhet ndonjë magji për Botëror?

“Nuk bëj magji. Mund të premtoj vetëm përkushtim dhe pasion. Do doja të dëgjoja më shumë fjalën ‘ne’ dhe jo ‘unë’. Pastaj për aspektet tekniko-taktike do mundohemi të bëjmë sa më pak dëme. Duhet të nxjerrim entuziazmin dhe ndjenjën e përkatësisë nga lojtarët, dhe besoj se do ia dalim.”

“Nuk kam folur me Acerbin. Është lojtar që ka dhënë shumë për futbollin italian dhe është folur shumë për të. Nuk është çështje që më ka prekur. Kam bërë zgjedhje të tjera. S’kam asgjë personale me të, por kam thirrur lojtarë më të rinj që mendoj se mund të na ndihmojnë.”

Historia e Gattusos me Italinë

Karriera e Gattusos me fanellën e kaltër është e gjatë dhe ka nisur që në vitin 1995 me Europianin U18 në Greqi. Në vitin 2000, me Tardellin si trajner, fitoi Europianin U21 dhe mori pjesë në Lojërat Olimpike në Sydney. Po atë vit bëri debutimin me Kombëtaren e madhe në miqësoren ndaj Suedisë.
Në 2002 mori pjesë në Botëror, në 2004 në Europian, por pa qenë titullar. Me Lippin ndryshoi gjithçka: ishte protagonist në kualifikimet dhe Botërorin 2006 që e fitoi Italia. Më pas mori pjesë në Europianin 2008 dhe në Kupën e Konfederatave 2009 si kapiten.
Në Botërorin 2010, karriera e tij përfundoi me humbjen ndaj Sllovakisë. Para fillimit të Botërorit në Afrikën e Jugut, ai kishte paralajmëruar lamtumirën nga Kombëtarja:

“Në moshën 33 vjeç dhe në rolin tim, është e drejtë të lësh vend për ata me më shumë energji,” – tha atëherë.
Sot, 15 vjet më vonë, Ringhio ka mundësinë të realizojë ëndrrën e tij, të drejtojë Italinë në një Botëror.

Top Channel